ٹائیگر شروف فائرنگ کیس میں نیا انکشاف، اصل ہدف عامر خان تھے: بھارتی پولیس

ممبئی پولیس نے بالی ووڈ اداکار ٹائیگر شروف کی گاڑی پر فائرنگ کے واقعے کی تحقیقات میں اہم انکشاف کیا ہے۔ بھارتی میڈیا رپورٹس کے مطابق، حملہ آوروں کا مبینہ اصل ہدف اداکار عامر خان تھے، تاہم ان تک رسائی مشکل ہونے کے باعث ٹائیگر شروف کو نشانہ بنایا گیا۔

رپورٹس کے مطابق، مشتبہ افراد نے تقریباً ایک ماہ تک ممبئی میں قیام کیا اور عامر خان کی رہائش گاہ کے اطراف نگرانی بھی کی۔ پولیس ذرائع کا کہنا ہے کہ اس مبینہ منصوبے کا تعلق لارنس بشنوئی گینگ سے جوڑا جا رہا ہے، جبکہ عامر خان کو اس سے قبل دھمکیاں ملنے کی اطلاعات بھی سامنے آئی تھیں۔

18 اکتوبر کو جوہو کے علاقے میں فائرنگ کے واقعے میں ٹائیگر شروف محفوظ رہے، تاہم ان کے ڈرائیور اور ایک راہ گیر کو چوٹیں آئیں۔ حملہ آور موٹر سائیکل پر فرار ہوگئے تھے۔

پولیس کے مطابق، تین مشتبہ افراد کو 19 اکتوبر کو راجستھان کے شہر کوٹا میں ٹرین سے گرفتار کیا گیا۔ تفتیش کے دوران اسلحہ اور کارتوس بھی برآمد کیے گئے، جنہیں فرانزک جانچ کے لیے بھیجا گیا ہے۔

حکام اس معاملے میں دیگر مشتبہ افراد کے ممکنہ کردار اور مالی معاونت کے پہلوؤں کی بھی تحقیقات کر رہے ہیں۔ پولیس نے واضح کیا ہے کہ کیس کی تفتیش تاحال جاری ہے اور سامنے آنے والے دعوؤں کی مزید تصدیق کی جا رہی ہے۔