وال اسٹریٹ جرنل کا دعویٰ: یو اے ای کی ایران کے خلاف خفیہ فوجی کارروائیوں میں مبینہ شمولیت

امریکی اخبار وال اسٹریٹ جرنل کی ایک تازہ رپورٹ میں دعویٰ کیا گیا ہے کہ متحدہ عرب امارات (یو اے ای) نے ایران کے خلاف جاری کشیدگی کے دوران مبینہ طور پر خفیہ طور پر بعض فوجی کارروائیوں میں حصہ لیا ہے۔
رپورٹ کے مطابق یو اے ای، امریکا اور اسرائیل کے بعد تیسرا ملک بن سکتا ہے جس کے بارے میں کہا جا رہا ہے کہ اس نے ایران کے خلاف محدود جنگی کارروائیوں میں کردار ادا کیا ہے۔ ان میں خلیج فارس کے علاقے میں واقع لاوان جزیرے پر ایک آئل ریفائنری کو نشانہ بنانے کا واقعہ بھی شامل بتایا گیا ہے۔
رپورٹ میں یہ بھی کہا گیا ہے کہ یہ حملہ اپریل کے اوائل میں اس وقت پیش آیا جب خطے میں کشیدگی میں کمی کی کوششوں کے دوران جنگ بندی سے متعلق بیانات سامنے آ رہے تھے۔ ایران نے اس وقت کسی نامعلوم حملے میں اپنی تنصیبات کو نقصان پہنچنے کی تصدیق کی تھی۔
بعد ازاں ایران کی جانب سے مبینہ طور پر متحدہ عرب امارات اور کویت کی سمت میزائل اور ڈرون حملوں کی اطلاعات بھی سامنے آئیں، تاہم ان دعوؤں کی آزادانہ تصدیق نہیں ہو سکی۔
متحدہ عرب امارات کی وزارت خارجہ نے اس رپورٹ پر براہِ راست تبصرہ کرنے سے گریز کیا ہے، البتہ پہلے کے بیانات کا حوالہ دیتے ہوئے کہا گیا ہے کہ ملک کو اپنی سلامتی کے دفاع کا حق حاصل ہے۔ امریکی محکمہ دفاع پینٹاگون نے بھی اس معاملے پر کوئی باضابطہ ردعمل نہیں دیا۔
یاد رہے کہ اس سے قبل بھی بعض اسرائیلی میڈیا رپورٹس میں اسی نوعیت کے دعوے کیے گئے تھے جنہیں اماراتی حکام نے مسترد کر دیا تھا۔