والد کی ورزش بچوں کی صحت پر بھی اثرانداز ہوتی ہے، نئی تحقیق

ورزش صرف فرد کی ذاتی صحت کے لیے ہی فائدہ مند نہیں بلکہ اس کے مثبت اثرات اگلی نسلوں تک بھی منتقل ہو سکتے ہیں۔ ایک حالیہ تحقیق میں یہ دلچسپ انکشاف سامنے آیا ہے کہ والد کی جسمانی سرگرمیاں بچوں کی صحت اور جسمانی کارکردگی پر مثبت اثر ڈال سکتی ہیں۔

چین کی نانجنگ یونیورسٹی اور نانجنگ میڈیکل یونیورسٹی کے سائنسدانوں نے چوہوں پر تجربات کے دوران پایا کہ ورزش کرنے والے نر چوہوں کی صحت مند خصوصیات — جیسے بہتر مسلز، کم چربی اور مضبوط ہڈیاں — جینیاتی طور پر ان کی اگلی نسل کو منتقل ہوئیں۔

تحقیق میں شامل ایک گروپ کو روزانہ 8 ہفتوں تک دوڑنے کی تربیت دی گئی، جبکہ دوسرے گروپ کو ساکن طرزِ زندگی اختیار کرنے دیا گیا۔ بعد ازاں دونوں گروپس کے بچوں کا تجزیہ کیا گیا، جس سے معلوم ہوا کہ فعال چوہوں کے بچوں کی جسمانی کارکردگی بہتر تھی، جبکہ غیر فعال چوہوں کے بچوں نے مختلف ٹیسٹوں میں کمزور نتائج دکھائے۔

ماہرین کا کہنا ہے کہ والد کی جسمانی سرگرمیاں بچوں کی میٹابولک صحت اور ایروبک صلاحیت کو بہتر بنانے میں مددگار ہو سکتی ہیں۔ ان کا مزید کہنا تھا کہ ورزش ایک آسان، سستا اور فطری طریقہ ہے جو نہ صرف خود فرد بلکہ آئندہ نسلوں کی صحت پر بھی مثبت اثر ڈالتا ہے۔

تحقیق میں یہ بھی نشاندہی کی گئی کہ موجودہ دور میں جسمانی سرگرمیوں میں کمی اور غیر متوازن خوراک کے باعث دنیا بھر میں موٹاپے اور دائمی بیماریوں میں اضافہ ہو رہا ہے۔ ایسے میں صحت مند طرزِ زندگی اپنانا نہایت ضروری ہے۔