نیند کے دوران اچانک جھٹکا کیوں آتا ہے؟

اکثر افراد کو نیند میں جاتے وقت اچانک جھٹکا محسوس ہوتا ہے جس سے آنکھ کھل جاتی ہے یا جسم میں جھرجھری دوڑ جاتی ہے۔ طبی اصطلاح میں اسے ہائپنک جرک کہاجاتاہے اور یہ عموماً کسی خطرے کی علامت نہیں ہوتا۔
جب ہم سوتے ہیں تو دماغ ایسے کیمیکلز خارج کرتا ہے جو پٹھوں کو وقتی طور پر مفلوج کر دیتے ہیں تاکہ ہم خواب میں حرکات کو حقیقت میں نہ کریں۔ بیداری سے نیند میں منتقلی ہمیشہ ہموار نہیں ہوتی، اور اس دوران اگر دماغ اور جسم کی ہم آہنگی میں خلل آجائے تو اچانک پٹھوں میں سکڑاؤ پیدا ہوتا ہے جسے جھٹکے کی صورت میں محسوس کیا جاتا ہے۔
ہائپنک جرک کے امکانات کچھ عوامل سے بڑھ سکتے ہیں جیسے ذہنی دباؤ، شدید تھکن، کیفین کا زیادہ استعمال، یا بے ترتیب نیند کا شیڈول۔ عام طور پر یہ کیفیت بے ضرر ہے اور فوراً دوبارہ نیند آ جاتی ہے، مگر اگر جھٹکے بار بار آئیں یا نیند متاثر ہو تو معالج سے مشورہ مفید رہتا ہے۔
بہتری کے لیے سونے اور جاگنے کا وقت مقرر رکھیں، کیفین اور محرک مشروبات سے پرہیز کریں، اسکرین کا استعمال کم کریں اور ذہنی دباؤ کم کرنے کے لیے ہلکی ورزش یا گہری سانسیں لیں۔ زیادہ تر افراد کے لیے یہ ایک عام حیاتیاتی عمل ہے جو خود بخود ختم ہو جاتا ہے۔