میٹا کا نیا اقدام: ایپل واچ کے لیے واٹس ایپ ایپ لانچ

میٹا نے ایپل واچ صارفین کے لیے واٹس ایپ ایپلی کیشن متعارف کرادی ہے، جس سے اب صارفین اپنی گھڑی سے براہِ راست چیٹنگ، وائس میسجز اور کال نوٹیفکیشنز حاصل کرسکیں گے۔

نئی واچ او ایس ایپ میں صارفین کو پیغامات بھیجنے اور موصول کرنے کے ساتھ چیٹ ہسٹری تک ہر وقت رسائی حاصل ہوگی۔ اس کے علاوہ امیجز اور اسٹیکرز کی سہولت بھی شامل کی گئی ہے، جبکہ پیغامات کے تحفظ کے لیے اینڈ ٹو اینڈ انکرپشن کی سہولت فراہم کی گئی ہے۔

یہ ایپ ایپل واچ سیریز 4 اور اس کے بعد کے ماڈلز پر دستیاب ہوگی۔ اگرچہ ابتدائی طور پر اسے آئی فون سے منسلک کرنا ضروری ہوگا، تاہم صارفین کو اب میسجنگ کے لیے ہر وقت فون استعمال کرنے کی ضرورت نہیں پڑے گی۔

میٹا کے مطابق اگر آئی فون بند ہو تو ممکن ہے کہ واٹس ایپ ایپل واچ پر کام نہ کرے۔ دوسری جانب، اینڈرائیڈ اسمارٹ واچز پر واٹس ایپ کا استعمال 2023 سے ممکن ہے۔