معین علی نے آئی پی ایل چھوڑ کر پی ایس ایل کو ترجیح دے دی

انڈین پریمیئر لیگ (آئی پی ایل) اور پاکستان سپر لیگ (پی ایس ایل) کے شیڈول کے باہمی ٹکراؤ نے ایک بار پھر غیر ملکی کرکٹرز کو مشکل فیصلوں کے سامنے کھڑا کر دیا ہے، جہاں اکثر کھلاڑی ایک ہی لیگ کا انتخاب کرنے پر مجبور ہو جاتے ہیں۔
اسی تناظر میں معین علی کی مثال سامنے آئی ہے، جنہوں نے اس بار پاکستان سپر لیگ میں شرکت کو ترجیح دیتے ہوئے انڈین پریمیئر لیگ سے دور رہنے کا فیصلہ کیا۔ 38 سالہ سابق انگلش آل راؤنڈر نے اپنے اس فیصلے کے بارے میں جاری بحث پر وضاحت پیش کی ہے۔
ایک پوڈکاسٹ میں گفتگو کرتے ہوئے معین علی نے بتایا کہ ان کے فیصلے کے پیچھے متعدد وجوہات تھیں۔ ان کا کہنا تھا کہ وہ اب بھی کرکٹ کھیلنا اور بہتر کارکردگی دکھانا چاہتے ہیں تاکہ اپنے کیریئر کو مزید آگے بڑھا سکیں۔ ان کے مطابق کراچی میں کھیلنے کا موقع بھی ایک اہم وجہ تھا، جبکہ پی ایس ایل کا مختصر دورانیہ ان کے اور ان کے خاندان کے لیے زیادہ موزوں ہے۔
انہوں نے گزشتہ آئی پی ایل سیزن کے تجربے کا ذکر کرتے ہوئے کہا کہ محدود مواقع نے بھی ان کے فیصلے کو متاثر کیا۔ وہ صرف چند میچز کھیل سکے اور انہیں بیٹنگ کے مواقع بھی کم ملے، جس کی وجہ سے وہ میدان میں زیادہ وقت گزارنے کی خواہش رکھتے ہیں۔
معین علی کا کہنا تھا کہ کیریئر کے اس مرحلے پر وہ زیادہ سے زیادہ کھیلنا اور کھیل سے لطف اندوز ہونا چاہتے ہیں۔ انہوں نے یہ بھی کہا کہ وہ طویل عرصے سے پی ایس ایل میں کھیلنے کے خواہش مند تھے، لیکن شیڈول کے ٹکراؤ کے باعث ایسا ممکن نہ ہو سکا۔
اس وقت وہ کراچی کنگز کا حصہ ہیں اور لیگ میں اپنی خدمات انجام دے رہے ہیں، جہاں انہیں معقول معاوضہ بھی دیا جا رہا ہے۔