فلسطینی قیدیوں کے لیے قطر، ترکی، ملائیشیا اور پاکستان سے ممکنہ آبادکاری پر غور

اسرائیل سے رہا ہونے والے فلسطینی قیدی جو مصر میں جلا وطن کیے گئے ہیں، ان کے مستقبل کے لیے مختلف ممالک سے بات چیت کی جا رہی ہے۔ امریکی ثالثی سے ہونے والے جنگ بندی معاہدے کے تحت حماس نے تقریباً دو ہزار فلسطینی قیدیوں کے بدلے 20 اسرائیلی یرغمالیوں کو رہا کیا تھا۔ ان میں سے 154 قیدیوں کو مصر بھیجا گیا، جہاں انہیں ایک فائیو اسٹار ہوٹل میں رکھا گیا ہے۔

حکام نے قیدیوں کو ہوٹل کے باہر جانے کی اجازت نہیں دی اور ان کی قانونی حیثیت ابھی تک غیر واضح ہے۔ بیشتر قیدی اسرائیلی فوجی عدالتوں میں الزامات کے تحت طویل قید کاٹ چکے ہیں، تاہم اقوام متحدہ اور انسانی حقوق کی تنظیمیں ان مقدمات کو غیر منصفانہ قرار دیتی ہیں۔

قیدیوں کا کہنا ہے کہ وہ آزادی کے باوجود محدود زندگی گزار رہے ہیں اور ان کے خاندانوں سے ملاقات میں بھی مشکلات ہیں۔ فلسطینی اتھارٹی کے مطابق اسرائیل کی جیلوں میں اس وقت تقریباً 11 ہزار فلسطینی قید ہیں۔

قیدیوں کی ممکنہ آبادکاری کے لیے قطر، ترکی، ملائیشیا اور پاکستان سمیت دیگر ممالک سے رابطے کیے جا رہے ہیں، اور اس وقت ان کے قیام کے اخراجات قطر برداشت کر رہا ہے۔