دبئی میں گھروں کی تعمیر کے لیے جدید روبوٹ ٹیکنالوجی متعارف

متحدہ عرب امارات کے شہر دبئی نے تعمیراتی شعبے میں ایک جدید قدم اٹھاتے ہوئے گھروں کی تعمیر کے لیے روبوٹک نظام متعارف کرانے کا اعلان کیا ہے۔
دبئی میونسپلٹی کے مطابق شہر میں دنیا کا پہلا رہائشی ویلا تعمیر کیا جائے گا جو مکمل طور پر خودکار روبوٹس کے ذریعے بنایا جائے گا۔ ان روبوٹس کو خاص طور پر اس مقصد کے لیے تیار کیا گیا ہے اور یہ عمارت کے ڈھانچے کی تیاری سمیت دیگر بنیادی تعمیراتی کام انجام دیں گے۔
حکام نے بتایا کہ یہ منصوبہ تعمیراتی شعبے میں جدید روبوٹ ٹیکنالوجی کے عملی استعمال کی ایک مثال ہوگا۔ اس پروجیکٹ میں 25 سے زائد مقامی اور بین الاقوامی ادارے حصہ لے رہے ہیں، جو اپنی مہارت اور جدید ٹیکنالوجی کے ذریعے اس منصوبے کو کامیاب بنانے میں اہم کردار ادا کریں گے۔
منصوبے کا مقصد تعمیراتی عمل کو تیز، محفوظ اور مؤثر بنانا ہے، اور یہ بھی جانچنا ہے کہ روبوٹس روزمرہ کی تعمیراتی سرگرمیوں میں کس حد تک مؤثر ہو سکتے ہیں۔
حکام کا کہنا ہے کہ اگر یہ تجربہ کامیاب رہا تو مستقبل میں دبئی اور دیگر ممالک میں گھروں اور تجارتی عمارتوں کی تعمیر میں روبوٹک ٹیکنالوجی کو بڑے پیمانے پر اپنایا جا سکتا ہے، جو تعمیراتی صنعت کے لیے ایک نئی سمت فراہم کرے گی۔