خیبرپختونخوا کے نئے وزیراعلیٰ کی حلف برداری آج شام گورنر ہاؤس میں ہوگی

پشاور – خیبرپختونخوا کے نو منتخب وزیراعلیٰ سہیل آفریدی آج شام 4 بجے گورنر ہاؤس پشاور میں اپنے عہدے کا حلف اٹھائیں گے۔ اس حوالے سے وزیراعلیٰ ہاؤس کو باضابطہ طور پر اطلاع دی جا چکی ہے۔

یہ پیش رفت پشاور ہائی کورٹ کے فیصلے کے بعد سامنے آئی، جس میں عدالت نے گورنر کو ہدایت کی تھی کہ وہ آج شام تک نئے وزیراعلیٰ سے حلف لیں، بصورت دیگر صوبائی اسمبلی کے اسپیکر کو حلف لینے کا اختیار حاصل ہوگا۔

گورنر خیبرپختونخوا فیصل کریم کنڈی، جو ان دنوں کراچی میں موجود تھے، عدالتی حکم کے بعد اپنا دورہ مختصر کر کے گزشتہ رات پشاور پہنچ گئے۔ ذرائع کے مطابق پاکستان پیپلز پارٹی کے چیئرمین بلاول بھٹو زرداری نے بھی گورنر کو فوری طور پر پشاور واپس جا کر عدالتی فیصلے پر عمل درآمد کرنے کی ہدایت کی تھی۔

اس سے قبل وزیراعلیٰ کے انتخاب کے عمل کو لے کر اپوزیشن جماعتوں نے عدالت سے رجوع کیا تھا، ان کا مؤقف تھا کہ چونکہ علی امین گنڈاپور کا استعفیٰ تاحال منظور نہیں ہوا، اس لیے سہیل آفریدی کا انتخاب قانونی نہیں۔ تاہم تحریک انصاف کی جانب سے مؤقف اختیار کیا گیا کہ علی امین گنڈاپور اسمبلی کے فلور پر استعفیٰ دے چکے ہیں اور گورنر بلاجواز حلف میں تاخیر کر رہے ہیں۔

عدالت نے اس تمام صورتحال کا نوٹس لیتے ہوئے واضح کیا کہ آئینی عمل میں مزید تاخیر نہیں ہونی چاہیے، اور گورنر یا اسپیکر میں سے کوئی ایک مقررہ وقت پر حلف لینے کا پابند ہوگا۔