جہیز کے لیے قتل کا کیس درج، مگر خاتون زندہ برآمد

بھارت کی ریاست اترپردیش کے ضلع اورئیہ میں دو سال سے لاپتا خاتون کو زندہ حالت میں بازیاب کر لیا گیا ہے۔ خاتون کی گمشدگی کے بعد اہلِ خانہ کی جانب سے پہلے لاپتا ہونے کی رپورٹ درج کروائی گئی تھی، تاہم بعد میں عدالت کی ہدایت پر شوہر سمیت 7 افراد کے خلاف قتل اور جہیز سے متعلق سنگین دفعات کے تحت مقدمہ قائم کیا گیا۔

پولیس کی اسپیشل آپریشنز گروپ اور سرویلنس ٹیم کی تحقیقات کے دوران خاتون کو زندہ تلاش کر لیا گیا ہے۔ حکام کے مطابق خاتون شادی کے تقریباً ڈیڑھ سال بعد لاپتا ہوئی تھی۔

سرکل آفیسر اشوک کمار سنگھ کا کہنا ہے کہ اب خاتون سے پوچھ گچھ جاری ہے تاکہ یہ معلوم ہو سکے کہ وہ کہاں اور کیوں غائب رہی، اور آیا سسرال والوں پر عائد الزامات میں کتنی صداقت ہے۔

واقعے کے بعد مقدمے میں شامل الزامات اور کرداروں کا دوبارہ جائزہ لیا جا رہا ہے، جبکہ معاملے کی مزید تفتیش جاری ہے۔