ایران امریکا سے مذاکرات کی بحالی پر آمادہ، پاکستان اور قطر کو مؤقف سے آگاہ کردیا

اسلام آباد: سفارتی ذرائع کے مطابق ایران نے پاکستان کو آگاہ کیا ہے کہ وہ امریکا کے ساتھ مذاکرات دوبارہ شروع کرنے کے لیے آمادہ ہے۔ اطلاعات ہیں کہ پاکستان اور قطر کی ثالثی میں دونوں ممالک کے درمیان تعطل کا شکار سفارتی عمل کو بحال کرنے کی کوششیں جاری ہیں۔

عرب میڈیا کی رپورٹس کے مطابق امریکا اور ایران نے پاکستان اور قطر کی جانب سے پیش کی گئی تجاویز پر اپنے اپنے جوابات ثالث ممالک کو پہنچا دیے ہیں۔ ان سفارتی تجاویز کا مقصد خطے میں کشیدگی کم کرنا اور دونوں ممالک کے درمیان مذاکرات کی راہ ہموار کرنا بتایا جا رہا ہے۔

رپورٹس کے مطابق ایران نے اشارہ دیا ہے کہ اگر مناسب حالات پیدا ہوں تو مذاکرات جنیوا، دوحہ یا اسلام آباد میں منعقد کیے جا سکتے ہیں۔ ذرائع کا کہنا ہے کہ ایران بات چیت کے دوران پہلے آبنائے ہرمز، پھر اپنے منجمد اثاثوں اور بعد ازاں جوہری پروگرام سے متعلق امور پر گفتگو چاہتا ہے، جبکہ وہ آبنائے ہرمز میں کسی نئی بحری راہداری کے قیام کی حمایت نہیں کرتا۔

یہ پیشرفت ایسے وقت میں سامنے آئی ہے جب اطلاعات کے مطابق گزشتہ دو راتوں کے دوران امریکا کی جانب سے ایران پر کوئی نیا حملہ نہیں کیا گیا اور ایران نے بھی خطے میں امریکی اہداف کے خلاف کسی نئی کارروائی کی اطلاع نہیں دی۔

ایرانی فوج کے ترجمان محمد اکرمی نیا کے مطابق گزشتہ دو راتوں میں امریکا کی جانب سے کوئی حملہ نہیں ہوا۔ ان کا کہنا تھا کہ ایران کی حکمت عملی جوابی کارروائی پر مبنی ہے، اسی لیے اس دوران فوجی کارروائیاں بھی روک کر رکھی گئی ہیں۔

تاہم، مذکورہ سفارتی پیش رفت اور مذاکرات سے متعلق دعووں کی آزاد ذرائع سے باضابطہ تصدیق ابھی سامنے نہیں آئی۔