امریکی کوہ پیما کا تائیوان کی بلند ترین عمارت پر حیران کن کارنامہ

مشہور امریکی فری سولو کوہ پیما الیکس ہونالڈ نے تائیوان کی سب سے اونچی عمارت تائی پے 101 کو بغیر کسی رسی یا حفاظتی آلات کے سر کر کے ایک حیران کن سنگِ میل عبور کر لیا۔ اس سنسنی خیز چڑھائی کے دوران عمارت کے اطراف موجود ہزاروں افراد نے نیچے سے تالیاں بجا کر اور نعرے لگا کر ان کی حوصلہ افزائی کی۔
یہ مہم تقریباً 91 منٹ پر مشتمل تھی جسے آن لائن اسٹریمنگ پلیٹ فارم نیٹ فلکس پر براہِ راست دکھایا گیا۔ عمارت کی چوٹی پر پہنچنے کے بعد ہونالڈ نے مختصر ردِعمل دیتے ہوئے کہا کہ اوپر سے منظر بے حد شاندار تھا اور شہر کو اس زاویے سے دیکھنا ایک یادگار احساس ہے۔
بعد ازاں میڈیا سے گفتگو میں انہوں نے بتایا کہ خراب موسم کے باعث اس مہم کو ایک دن کے لیے مؤخر کرنا پڑا تھا۔ ان کا کہنا تھا کہ اگرچہ ایک موقع پر انہوں نے بغیر اجازت چڑھنے کے بارے میں سوچا، لیکن عمارت کی انتظامیہ اور مقامی لوگوں کے احترام میں انہوں نے ایسا نہ کرنے کا فیصلہ کیا۔
508 میٹر بلند تائی پے 101 کئی برس تک دنیا کی سب سے اونچی عمارت رہی اور آج بھی تائیوان کی ایک نمایاں علامت سمجھی جاتی ہے۔ اس مہم کے لیے عمارت کی انتظامیہ اور شہر کی حکومت نے مکمل اجازت اور تعاون فراہم کیا تھا۔
نیٹ فلکس کے ایک ایگزیکٹو پروڈیوسر کے مطابق کسی قومی علامت سمجھی جانے والی عمارت کا اس طرح ایک کوہ پیما پر اعتماد کرنا غیر معمولی بات ہے، اور اس واقعے نے عالمی سطح پر خاصی توجہ حاصل کی۔
تائیوان کی سیاسی قیادت نے بھی اس موقع پر سوشل میڈیا کے ذریعے ہونالڈ اور نیٹ فلکس کا شکریہ ادا کیا۔ صدر لائی چنگ تے نے اپنے پیغام میں کہا کہ اس مہم نے دنیا کو نہ صرف تائی پے 101 دکھایا بلکہ تائیوان کے عوام کے جذبے، مہمان نوازی اور خوبصورتی کو بھی اجاگر کیا۔
واضح رہے کہ اس سے قبل 2004 میں فرانسیسی کوہ پیما ایلین رابرٹ نے بھی تائی پے 101 کو سر کیا تھا، تاہم اس وقت حفاظتی رسی استعمال کی گئی تھی اور چڑھائی میں تقریباً چار گھنٹے لگے تھے۔