پاکستانی بیوٹی کریئیٹر کی اسپائیڈر مین تھیم ساڑھی نے لندن ریڈ کارپٹ پر سب کی توجہ حاصل کر لی

لندن میں ہالی ووڈ فلم “اسپائیڈر مین: برینڈ نیو ڈے” کے پریمیئر کی تقریب میں پاکستانی نژاد میک اپ آرٹسٹ اور بیوٹی کانٹینٹ کریئیٹر عاطفہ ارشد کا منفرد فیشن انداز نمایاں رہا، جہاں ان کی اسپائیڈر مین سے متاثر ساڑھی نے حاضرین کی توجہ حاصل کر لی۔

لندن میں مقیم عاطفہ ارشد تقریب میں سیاہ رنگ کی خوبصورت ساڑھی پہن کر پہنچیں، جس پر سرخ رنگ کی باریک کڑھائی کے ذریعے اسپائیڈر مین کے مشہور جالے کے ڈیزائن کونمایاں کیا گیاتھا۔

یہ خصوصی ساڑھی لندن کی ڈیزائنر ریٹا قارنباخ نے تیار کی، جبکہ اس کی سلائی پاکستان میں عاطفہ ارشد کے خاندانی درزی نے کی۔ انہوں نے اس لباس کے ساتھ میچنگ فل سلیو بلاؤز پہنا، جو ان کے مکمل انداز کو مزید خوبصورت بنا رہا تھا۔

عاطفہ ارشد کے اس فیشن انتخاب کو معروف اسٹائلسٹ لا روچ نے بھی پسند کیا، جنہوں نے ان کی سوشل میڈیا پوسٹ پر تبصرہ کرتے ہوئے لباس کی تعریف کی۔

عاطفہ نے اپنے میک اپ اور ہیئر اسٹائل کو سادہ رکھا۔ انہوں نے بالوں کو جوڑے کی شکل میں باندھا جبکہ ہلکے میک اپ کے ذریعے اپنی ساڑھی کو نمایاں رکھا۔

فلم کے مرکزی اداکار ٹام ہالینڈ اور زندایا نے بھی پریمیئر کے موقع پر اپنے لباس میں اسپائیڈر مین تھیم کو شامل کیا۔ زندایا نے ہاتھی دانت کے رنگ کا گاؤن زیب تن کیا، جس پر سنہری تفصیلات اور مکڑی کی شکل کا ڈیزائن نمایاں تھا، جبکہ ٹام ہالینڈ نے بھی اپنے لباس میں مکڑی کے انداز کا بروچ شامل کیا۔

تقریب میں کئی فنکاروں نے فلم کے کردار سے متاثر فیشن اپنایا، تاہم عاطفہ ارشد کی منفرد پاکستانی ساڑھی نے خاص طور پر سب کی توجہ حاصل کی اور ریڈ کارپٹ کے یادگار فیشن لمحات میں شامل ہو گئی۔