لاس اینجلس: فیفا ورلڈ کپ 2026 کے کوارٹر فائنل میں اسپین نے سنسنی خیز مقابلے کے بعد بیلجیم کو 2-1 سے شکست دے کر سیمی فائنل کے لیے کوالیفائی کر لیا۔
کھیل کے 30ویں منٹ میں فابیان روئزنے گول کرکے اسپین کو برتری دلائی۔ بیلجیم نے جلد ہی واپسی کرتے ہوئے 41ویں منٹ میں چارلس ڈی کیٹیلیئر کے ذریعے اسکور برابر کر دیا، جو ٹورنامنٹ میں اسپین کے خلاف کیا جانے والا پہلا گول بھی تھا۔
دوسرے ہاف میں دونوں ٹیموں نے جارحانہ کھیل پیش کیا اور مقابلہ آخری لمحات تک برابر رہا۔ تاہم 88ویں منٹ میں پاؤ کیوبارسی کی جانب سے لگائی گئی دور سے طاقتور شاٹ کو بیلجیم کے متبادل گول کیپر سنبھال نہ سکے، جس کا فائدہ اٹھاتے ہوئے مائیکل میرینو نے ریباؤنڈ پر گیند جال میں پہنچا کر اسپین کو فیصلہ کن برتری دلا دی۔
بیلجیم کے پہلے نمبر کے گول کیپر تھیباؤٹ کورٹوئس انجری کے باعث دوسرے ہاف میں میدان چھوڑ گئے تھے، جس کے بعد متبادل گول کیپر نے ذمہ داری سنبھالی۔ میچ کے اختتام پر کورٹوئس نے اپنے ساتھی کی حوصلہ افزائی بھی کی۔
اسپین کے نوجوان اسٹار لیمین یامال کو شاندار کارکردگی پر میچ کا بہترین کھلاڑی قرار دیا گیا۔
میچ کے بعد مائیکل میرینو نے فتح پر خوشی کا اظہار کرتے ہوئے کہا کہ ٹیم نے پورے اعتماد اور تیاری کے ساتھ میدان میں بہترین کھیل پیش کیا، اور اب ان کی تمام تر توجہ سیمی فائنل پر مرکوز ہے۔
دوسری جانب فرانس پہلے ہی مراکش کو 2-0 سے شکست دے کر سیمی فائنل میں جگہ بنا چکا ہے۔ اب سیمی فائنل میں اسپین اور فرانس کے درمیان ایک دلچسپ اور کانٹے دار مقابلہ متوقع ہے، جو منگل کو ٹیکساس میں کھیلا جائے گا۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔