گوگل میپس میں نیا دلچسپ فیچر متعارف، پرانی اسٹریٹ ویو تصاویر اب موبائل پر بھی دستیاب

گوگل نے اسٹریٹ ویو کی 15ویں سالگرہ کے موقع پر اپنے صارفین کے لیے ایک نیا اور دلچسپ فیچر متعارف کرایا ہے، جس کے ذریعے اب اسمارٹ فون استعمال کرنے والے افراد بھی مختلف مقامات کی پرانی تصاویر دیکھ سکیں گے۔

اس سے قبل یہ سہولت صرف ڈیسک ٹاپ کمپیوٹرز اور لیپ ٹاپس تک محدود تھی، تاہم اب اینڈرائیڈ اور آئی او ایس صارفین بھی گوگل میپس ایپ کے ذریعے اس فیچر سے فائدہ اٹھا سکیں گے۔

نئے فیچر کے تحت صارفین کسی بھی اسٹریٹ ویو امیج کو کھول کر “See more dates” کا آپشن منتخب کر سکتے ہیں۔ اس کے بعد وہ اسی مقام کی مختلف سالوں پرانی تصاویر دیکھ سکیں گے اور جان سکیں گے کہ وقت کے ساتھ ان علاقوں میں کیا تبدیلیاں آئیں۔

یہ سہولت مکمل طور پر تصاویر کی دستیابی پر منحصر ہوگی، یعنی ہر مقام کی پرانی جھلک ہر جگہ موجود نہیں ہوگی۔

گوگل کا کہنا ہے کہ یہ فیچر صارفین کو اپنے اردگرد کے علاقوں کی تاریخی تبدیلیوں کو دیکھنے کا ایک نیا اور دلچسپ موقع فراہم کرتا ہے، جس سے لوگوں کا تجربہ مزید بہتر اور معلوماتی ہو جائے گا۔