فن لینڈ میں سونے کی تلاش کا منفرد مقابلہ، سیاحوں کو خزانہ ڈھونڈنے کا موقع

بچپن میں خزانے کی تلاش کی کہانیاں بہت سے لوگوں کی پسندیدہ رہی ہیں، اور اب فن لینڈ میں ایسا ہی ایک حقیقی تجربہ سیاحوں کے لیے پیش کیا جا رہا ہے۔

فن لینڈ کے شمالی خطے لاپ لینڈ کے معروف سیاحتی مقام لیوی (Levi) میں منتظمین نے تقریباً 20 ہزار یورو مالیت کی سونے کی ایک ڈلی چھپانے کا اعلان کیا ہے، جسے تلاش کرنے کے لیے عوام کو دعوت دی جائے گی۔

اس مہم کا آغاز 18 جون سے ہوگا۔ دلچسپی رکھنے والے افراد لیوی وزیٹر سینٹر میں رجسٹریشن کے بعد پہلا اشارہ حاصل کر سکیں گے، جبکہ بعد ازاں مزید سراغ مرحلہ وار جاری کیے جائیں گے۔

منتظمین کے مطابق شرکاء مختلف مقامی مقامات اور قدرتی راستوں پر دیے گئے اشاروں کی مدد سے خزانے تک پہنچنے کی کوشش کریں گے۔ اگر مقررہ مدت کے دوران سونا دریافت نہ ہو سکا تو آخری اشارہ 22 اگست کو جاری کیا جائے گا۔

لیوی عام طور پر سردیوں میں اسکیئنگ اور برفانی سرگرمیوں کے لیے مشہور ہے، تاہم گرمیوں میں یہاں آنے والے سیاحوں کی تعداد نسبتاً کم ہوتی ہے۔ یہی وجہ ہے کہ اس منفرد خزانہ تلاش مہم کے ذریعے گرمیوں کے موسم میں بھی سیاحوں کی توجہ حاصل کرنے کی کوشش کی جا رہی ہے۔

لاپ لینڈ کا یہ علاقہ گرمیوں میں ایک منفرد قدرتی منظر پیش کرتا ہے جہاں سورج کئی ہفتوں تک تقریباً 24 گھنٹے افق پر دکھائی دیتا ہے، جسے “مڈنائٹ سن” کہا جاتا ہے۔

منتظمین نے شرکاء سے اپیل کی ہے کہ وہ سونے کی تلاش کے دوران مقررہ حدود کی پابندی کریں اور علاقے کے قدرتی ماحول کو نقصان پہنچانے سے گریز کریں۔