فیلڈ مارشل عاصم منیر کا کوئٹہ گیریژن کا دورہ، افسران و جوانوں سے ملاقات

چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان کی ترقی کے خلاف پروپیگنڈے، پراکسیز اور منفی مہم چلانے والی قوتیں اپنے مقاصد میں کامیاب نہیں ہو سکیں گی۔
آئی ایس پی آر کے مطابق فیلڈ مارشل نے کوئٹہ گیریژن کا دورہ کیا، جہاں ان کی آمد پر کور کمانڈر کوئٹہ نے ان کا استقبال کیا۔ اپنے دورے کے دوران انہوں نے کمانڈ اینڈ اسٹاف کالج کوئٹہ میں زیرِ تربیت افسران اور فیکلٹی سے خطاب کیا۔
انہوں نے ادارے کے تربیتی معیار، پیشہ ورانہ صلاحیتوں اور مجموعی کارکردگی کو سراہتے ہوئے کہا کہ جدید جنگی حالات میں ابھرتی ہوئی ٹیکنالوجیز، ملٹی ڈومین آپریشنز اور تینوں مسلح افواج کے درمیان بہتر رابطہ اور ہم آہنگی انتہائی ضروری ہے۔ ان کے مطابق بدلتے ہوئے جنگی تقاضے مسلسل تیاری اور اعلیٰ پیشہ ورانہ مہارت کا تقاضا کرتے ہیں۔
فیلڈ مارشل نے زور دیا کہ افسران اپنی تربیت اور صلاحیتوں کو مسلسل بہتر بنائیں تاکہ کسی بھی صورتحال میں مؤثر جواب دیا جا سکے اور آپریشنل تیاری ہر وقت اعلیٰ سطح پر برقرار رہے۔
بعد ازاں انہوں نے بلوچستان میں تعینات افسران اور جوانوں سے ملاقات کی اور صوبے میں امن و امان برقرار رکھنے کے لیے ان کی کوششوں، حوصلے اور پیشہ ورانہ کارکردگی کو سراہا۔
انہوں نے کہا کہ مسلح افواج عوام کی حمایت کے ساتھ دہشت گردی کے مکمل خاتمے کے لیے پرعزم ہیں۔ ان کے مطابق ریاست کی ترقی کو جھوٹی خبروں یا منفی مہم کے ذریعے نہیں روکا جا سکتا، اور ریاستی اتحاد کے سامنے تمام منفی عناصر ناکام ہوں گے۔
انہوں نے یہ بھی کہا کہ پائیدار ترقی کے لیے بہتر حکمرانی، عوامی فلاح اور مؤثر سیکیورٹی اقدامات ناگزیر ہیں۔ فیلڈ مارشل نے بلوچستان حکومت کی سماجی اور معاشی بہتری کی کوششوں کو بھی سراہا اور کہا کہ دیرپا امن کے لیے عوامی فلاح پر مبنی پالیسیوں کا تسلسل ضروری ہے۔