پی ٹی آئی چیئرمین کا نمبر ہیک، جعلی پیغامات سے ہوشیار رہنے کی ہدایت

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے خبردار کیا ہے کہ ان کا واٹس ایپ اکاؤنٹ ہیک ہو گیا ہے اور عوام کو کسی بھی مشکوک پیغام یا کال سے محتاط رہنے کی ضرورت ہے۔
انہوں نے سوشل میڈیا پلیٹ فارم ایکس پر جاری بیان میں بتایا کہ ان کا واٹس ایپ اکاؤنٹ صبح تقریباً 11 بجے ہیکرز کے قبضے میں چلا گیا تھا، جس کے بعد اسے ڈیلیٹ کر دیا گیا۔ تاہم، ان کے مطابق ہیکرز اب بھی اسی نمبر کو استعمال کرتے ہوئے لوگوں سے رابطہ کر رہے ہیں۔
ان کا کہنا تھا کہ بعض افراد کو اس نمبر سے پیغامات بھیجے جا رہے ہیں جن میں مالی مدد یا رقم کی درخواست کی جا رہی ہے۔ انہوں نے واضح کیا کہ ایسے تمام پیغامات جعلی ہیں اور ان کا ان سے کوئی تعلق نہیں۔
انہوں نے پارٹی کارکنوں اور عوام سے اپیل کی کہ وہ کسی بھی قسم کی مالی لین دین سے گریز کریں اور ایسے پیغامات کو مکمل طور پر نظر انداز کریں تاکہ کسی ممکنہ نقصان سے بچا جا سکے۔
چیئرمین پی ٹی آئی نے مزید کہا کہ اس معاملے میں احتیاط برتنا انتہائی ضروری ہے اور کسی بھی غیر مصدقہ رابطے پر فوری ردعمل دینے سے گریز کیا جائے۔