رونا: کمزوری نہیں بلکہ ذہنی اور جسمانی صحت کے لیے فائدہ مند

ماہرین کے مطابق، رونا صرف جذباتی اظہار نہیں بلکہ جسم کا ایک قدرتی ردعمل ہے جو ذہنی دباؤ کم کرنے اور جسمانی سکون فراہم کرنے میں مددگار ثابت ہوتا ہے۔ خوشی یا غم میں بہائے جانے والے آنسو دل کی کیفیت بیان کرتے ہیں اور ذہنی بوجھ کو ہلکا کرتے ہیں۔
ہارمون کوچ پورنیما پیری کے مطابق، بے وجہ رونا جسمانی نظام کو ریگولیٹ کرنے کا ایک قدرتی طریقہ ہے۔ وہ بتاتی ہیں کہ آنکھوں سے بہنے والے آنسو کمزوری نہیں بلکہ تناؤ کو کم کرنے کا ایک ذریعہ ہیں۔ رونے سے پیرایسمپیتھٹک نروس سسٹم فعال ہوتا ہے اور جسم اسٹریس ہارمون کورٹیسول کی زیادتی سے باہر آجاتا ہے، جس سے انسان اندر سے ہلکا محسوس کرتا ہے۔
کلیولینڈ کلینک کی تحقیق کے مطابق، دل سے رونا ایسا محسوس کرواتا ہے جیسے سینے پر پڑا بھاری بوجھ ہٹ گیا ہو۔ جذبات کو دبانے سے جسم میں اسٹریس ہارمونز بڑھ جاتے ہیں، جبکہ رونا اندرونی دباؤ ختم کرکے منفی توانائی کو اثرانداز ہونے سے روکتا ہے۔
پورنیما پیری کہتی ہیں، ’’زیادہ رونا کمزوری نہیں بلکہ جسم توازن واپس لانے کی کوشش کر رہا ہوتا ہے۔‘‘ ماہرین کا کہنا ہے کہ تناؤ کم کرنے کے لیے سانس لینے کی تکنیکیں بھی مددگار ثابت ہو سکتی ہیں، کیونکہ یہ اعصابی نظام کو پرسکون کرتی ہیں اور رونے کے دوران جسم کو محفوظ ماحول فراہم کرتی ہیں۔
آخر میں، یہ بات واضح ہے کہ رونا ذہنی سکون اور جسمانی صحت کے لیے فائدہ مند ہے۔ اگلی بار جب آنسو آنے لگیں، انہیں روکنے کی کوشش نہ کریں بلکہ کھل کر رونے دیں تاکہ دل اور جسم دونوں ہلکے محسوس کریں۔