دل کے دورے کی علامات: گھر میں اکیلے ہونے کی صورت میں فوری اقدامات

دل کے دورے کے واقعات حالیہ برسوں میں تیزی سے بڑھ رہے ہیں، اور خاص طور پر 40 سال کے قریب افراد زیادہ متاثر ہو رہے ہیں۔ اکثر دل کا دورہ اچانک آتا ہے، اور اگر کوئی شخص گھر میں اکیلا ہو تو بروقت علاج نہ ملنے کی وجہ سے جان کا خطرہ بڑھ جاتا ہے۔
دل کے دورے سے پہلے بعض اوقات کچھ وارننگ علامات ظاہر ہوتی ہیں، جنہیں نظرانداز کرنا مہلک ثابت ہو سکتا ہے۔ عام علامات میں شامل ہیں:
سینے میں دباؤ یا بھاری پن، جو کبھی کبھی جلن یا سکڑن جیسا محسوس ہوتا ہے
درد کا پھیلاؤ جبڑے، گردن، کندھے، بازو یا پیٹھ تک
سانس لینے میں دشواری، متلی، چکر آنا، اور شدید پسینہ آنا
خواتین اور ذیابیطس کے مریضوں میں علامات مختلف ہو سکتی ہیں، جیسے تھکن، بدہضمی یا پیٹھ کے اوپری حصے میں درد۔ ابتدائی علامات کو پہچان کر فوری مدد طلب کرنا زندگی بچانے والا اقدام ہے۔
معروف امریکی کارڈیو ویسکولر سرجن ڈاکٹر جرمی لندن کے مطابق، گھر میں اکیلے ہونے کی صورت میں یہ اقدامات انتہائی اہم ہیں:
فوری ایمرجنسی کال کریں
جیسے ہی شدید سینے کا درد، سانس لینے میں دشواری یا شدید بے چینی محسوس ہو، فوراً ایمرجنسی نمبر پر کال کریں۔ فون اپنے قریب رکھیں اور کسی پڑوسی یا رشتہ دار کو فوری اطلاع دیں۔ اگر بات نہ کر سکیں تو اسپیکر آن کر کے ہیلپ لائن یا کسی قریبی شخص کو پیغام بھیجیں۔
اسپرین لیں (اگر دستیاب ہو)
اگر اسپرین سے الرجی نہیں ہے اور خون بہنے کی بیماری نہیں، تو اسپرین کی گولی آہستہ آہستہ چبا کر کھائیں۔ اس سے خون پتلا ہوتا ہے اور دل کی شریانوں میں خون جمنے کا عمل سست ہو سکتا ہے۔
دروازے اور لائٹس کھول دیں
ایمرجنسی ٹیم کے لیے گھر کا راستہ آسان بنائیں۔ داخلی دروازہ کھلا رکھنا بہتر ہے۔
بیٹھیں یا لیٹ جائیں
دل کے دورے کے دوران بے ہوشی یا اچانک گرنے کا خطرہ ہوتا ہے، اس لیے کسی محفوظ جگہ پر بیٹھیں یا لیٹ جائیں۔
کسی قریبی شخص کو اطلاع دیں
کال پر رابطہ قائم رکھیں تاکہ وہ آپ کی حالت پر نظر رکھ سکیں اور بروقت مدد فراہم کر سکیں۔
دل کا دورہ ایک سنگین صورتحال ہے، مگر بروقت اور صحیح اقدامات سے جان بچائی جا سکتی ہے۔ ان ہدایات پر عمل کر کے ایمبولینس یا ڈاکٹر کے پہنچنے تک اپنی حفاظت کی جا سکتی ہے۔