ٹرمپ کے امن منصوبے کے تحت غزہ بورڈ آف پیس کی تشکیل، ارکان کے نام جاری

وائٹ ہاؤس نے سابق امریکی صدر ڈونلڈ ٹرمپ کے مجوزہ امن منصوبے کے تحت قائم کیے جانے والے غزہ بورڈ آف پیس کے ارکان کے ناموں کا اعلان کر دیا ہے۔
اعلامیے کے مطابق میجر جنرل جیسپر جیفرز کو عالمی استحکام فورس کا کمانڈر مقرر کیا گیا ہے۔ بورڈ میں امریکی وزیر خارجہ مارکو روبیو، ٹرمپ کے خصوصی نمائندے اسٹیو وٹکوف اور صدر کے داماد جیرڈ کشنر کو بھی شامل کیا گیا ہے۔
آریے لائٹ اسٹون اور جوش گرون بام کو بورڈ کے سینئر مشیر مقرر کیا گیا ہے، جبکہ نکولے ملادینوف کو ایگزیکٹو رکن نامزد کیا گیا ہے جو غزہ کے لیے اعلیٰ نمائندے کے طور پر ذمہ داریاں انجام دیں گے۔
بورڈ آف پیس میں برطانیہ کے سابق وزیراعظم ٹونی بلیئر، مارک روون، اجے بنگا اور رابرٹ گیبریل بھی شامل ہیں۔
اعلامیے کے مطابق غزہ میں بورڈ آف پیس کا قیام سکیورٹی، انسانی امداد اور تعمیر نو کے منصوبوں میں باہمی تعاون کو یقینی بنانے کے لیے کیا گیا ہے۔ اس کے ساتھ ساتھ یہ بورڈ فلسطینی اتھارٹی اور طرزِ حکمرانی میں اصلاحات کے عمل میں بھی معاون کردار ادا کرے گا۔
واضح رہے کہ اس سے قبل امریکی صدر نے عندیہ دیا تھا کہ بورڈ آف پیس کے ارکان کے نام جلد منظرِ عام پر لائے جائیں گے۔