اوپن اے آئی نے چیٹ جی پی ٹی اٹلس ویب براؤزر متعارف کرا دیا

مصنوعی ذہانت کی معروف کمپنی اوپن اے آئی نے ایک نیا ویب براؤزر “چیٹ جی پی ٹی اٹلس” متعارف کرایا ہے، جو جنریٹیو اے آئی ٹیکنالوجی سے لیس ہے۔ اس براؤزر کو گوگل کروم جیسے روایتی براؤزرز کا متبادل سمجھا جا رہا ہے، اور اسے چیٹ جی پی ٹی کے تجربے کو براہ راست ویب براؤزنگ میں شامل کرنے کی ایک اہم کوشش قرار دیا جا رہا ہے۔

اوپن اے آئی کی جانب سے اس براؤزر کا اعلان ایک یوٹیوب لائیو اسٹریم کے دوران کیا گیا۔ ابتدائی طور پر یہ براؤزر صرف میک او ایس صارفین کے لیے دستیاب ہوگا، جبکہ ونڈوز، اینڈرائیڈ اور آئی او ایس پر اس کی سپورٹ مستقبل قریب میں متعارف کرائی جائے گی۔

چیٹ جی پی ٹی اٹلس میں روایتی براؤزر فیچرز جیسے ٹیبز، بک مارکس، ایکسٹینشنز اور انکوگنیٹو موڈ شامل ہیں، لیکن اس کی خاص بات یہ ہے کہ اس میں چیٹ جی پی ٹی کی سہولت کو براؤزنگ تجربے کا حصہ بنایا گیا ہے۔ صارفین نئی ٹیب کھولتے وقت ویب ایڈریس لکھنے کے ساتھ ساتھ براہ راست چیٹ جی پی ٹی سے سوال بھی کر سکتے ہیں۔

براؤزر میں ایک سائیڈ بار موجود ہے جو وزٹ کیے گئے ویب پیجز کا تجزیہ کرتا ہے اور ان کا خلاصہ، وضاحت یا متعلقہ سوالات کے جوابات فراہم کرتا ہے۔ اس کے علاوہ، ایک “میموری” فیچر بھی شامل کیا گیا ہے جو صارف کی براؤزنگ ہسٹری اور موضوعات کو محفوظ رکھتا ہے تاکہ بعد میں آسانی سے رسائی حاصل کی جا سکے۔

چیٹ جی پی ٹی اٹلس نیچرل لینگوئج کمانڈز کو بھی سپورٹ کرتا ہے۔ مثال کے طور پر، اگر صارف “reopen the shoes I looked at yesterday” یا “clean up my tabs” جیسے جملے ٹائپ کرے تو براؤزر خودکار طور پر متعلقہ کارروائی انجام دیتا ہے۔

اوپن اے آئی کی یہ پیشرفت ایسے وقت میں سامنے آئی ہے جب مختلف ٹیکنالوجی کمپنیاں ویب براؤزنگ میں اے آئی کے استعمال کو مزید فروغ دے رہی ہیں۔ حال ہی میں گوگل نے اپنے براؤزر کروم میں جیمنائی اے آئی کو شامل کیا ہے جبکہ Perplexity نامی کمپنی بھی اپنا اے آئی براؤزر “کومٹ” متعارف کرا چکی ہے۔