غزہ: جنگ بندی معاہدے کے تحت اسرائیلی فوج کا جزوی انخلا شروع کرنے کا اعلان

اسرائیلی فوج نے اعلان کیا ہے کہ وہ غزہ کی پٹی سے اپنے کچھ فوجی دستے واپس بلانے کی تیاری کر رہی ہے۔ یہ اعلان اسرائیل اور حماس کے درمیان حالیہ جنگ بندی اور قیدیوں کے تبادلے کے معاہدے کے بعد سامنے آیا ہے۔

فوجی ترجمان کے مطابق، یہ اقدام سیاسی قیادت کی ہدایت اور زمینی صورتحال کے جائزے کے بعد کیا جا رہا ہے، جس کا مقصد معاہدے پر مؤثر عمل درآمد کو یقینی بنانا ہے۔ ترجمان کا کہنا تھا کہ فوج اس وقت بھی غزہ میں تعینات ہے اور کسی بھی ممکنہ تبدیلی یا کارروائی کے لیے تیار ہے۔

معاہدے کے ابتدائی مرحلے کے تحت حماس کی جانب سے قیدی بنائے گئے 20 افراد کو آئندہ چند دنوں میں رہا کیا جائے گا، جب کہ بدلے میں فلسطینی قیدیوں کو بھی آزادی ملے گی۔ اس کے ساتھ ساتھ اسرائیلی فوج غزہ کے بیشتر علاقوں سے جزوی انخلا شروع کرے گی۔

فوجی حکام نے واضح کیا ہے کہ انخلا مکمل نہیں ہو گا بلکہ دستوں کی تعیناتی میں عملی تبدیلیاں کی جائیں گی تاکہ سیکورٹی اور زمینی صورتحال پر نظر رکھی جا سکے۔

میڈیا رپورٹس کے مطابق، اسرائیلی فوج نے غزہ کے مختلف علاقوں سے واپسی کے لیے ہنگامی منصوبے تیار کیے ہیں۔ ان منصوبوں کے تحت فوجی قافلے مخصوص علاقوں تک محدود ہوں گے، جب کہ فضائی نگرانی اور انٹیلیجنس سرگرمیاں جاری رہیں گی۔

یہ اقدام غزہ میں جاری دو سالہ تنازع کے دوران کسی ممکنہ پائیدار امن کی جانب ایک اہم پیش رفت قرار دیا جا رہا ہے۔