اقوام متحدہ کی انسانی حقوق کونسل کا ہنگامی اجلاس، دوحہ میں فضائی حملے پر غور

جنیوا میں اقوام متحدہ کی انسانی حقوق کونسل کا ہنگامی اجلاس آج منعقد ہو رہا ہے، جسے پاکستان اور کویت کی درخواست پر بلایا گیا ہے۔ اجلاس میں قطر کے دارالحکومت دوحہ میں اسرائیلی فضائی حملے کے بعد پیدا ہونے والی صورتحال کا جائزہ لیا جائے گا۔

یہ حملہ 9 ستمبر کو اس وقت کیا گیا جب حماس کے متعدد رہنما دوحہ میں ایک اہم اجلاس میں شریک تھے۔ حملے میں حماس کے چھ ارکان جاں بحق ہوئے، تاہم تنظیم کی اعلیٰ قیادت محفوظ رہی۔ حماس ذرائع کے مطابق، اجلاس میں امریکی صدر کی جانب سے غزہ میں جنگ بندی سے متعلق تجویز پر غور کیا جا رہا تھا۔

اسرائیلی مشن نے انسانی حقوق کونسل کے اس اجلاس کو “مضحکہ خیز” قرار دیا ہے اور کہا ہے کہ اس کا کوئی بھی نتیجہ انسانی حقوق کے عالمی نظام پر منفی اثر ڈالے گا۔

اجلاس میں عالمی برادری کی جانب سے ممکنہ ردِعمل، انسانی حقوق کی خلاف ورزیوں اور مشرق وسطیٰ میں کشیدگی پر بات چیت متوقع ہے۔