
اسپیشل سیونگز سرٹیفکیٹس کے منافع میں کمی، شارٹ ٹرم اسکیموں پر شرح بڑھا دی گئی، کئی دیگر اسکیموں کے منافع برقرار
اسلام آباد: ڈائریکٹوریٹ آف نیشنل سیونگز نے قومی بچت کی مختلف اسکیموں پر منافع کی شرحوں میں ردوبدل کرتے ہوئے نئی شرحوں کا اعلان کردیا ہے۔ نئی پالیسی کے تحت بعض سرٹیفکیٹس پر منافع کم کیا گیا ہے، جبکہ مختصر مدت کی بچت اسکیموں میں اضافہ کیا گیا ہے۔
اعلان کردہ نئی شرحوں کے مطابق اسپیشل سیونگز سرٹیفکیٹس کے پہلے پانچ منافعوں کی شرح 11.8 فیصد مقرر کی گئی ہے، جبکہ چھٹے منافع کی شرح 12.8 فیصد پر برقرار رکھی گئی ہے۔
ریگولر انکم سرٹیفکیٹس پر سالانہ منافع کی شرح 12.12 فیصد برقرار رکھنے کا فیصلہ کیا گیا ہے۔ اسی طرح بہبود سیونگز سرٹیفکیٹس، پنشنرز اکاؤنٹس اور شہدا فیملی اکاؤنٹس پر منافع کی شرح 12.96 فیصد میں بھی کوئی تبدیلی نہیں کی گئی۔
ڈیفنس سیونگز سرٹیفکیٹس کے منافع کی شرح بھی سابقہ سطح پر برقرار رکھی گئی ہے۔
دوسری جانب مختصر مدت کی سرمایہ کاری کرنے والوں کے لیے شارٹ ٹرم سیونگز سرٹیفکیٹس پر منافع بڑھا دیا گیا ہے۔ نئی شرحوں کے تحت تین ماہ کے سرٹیفکیٹس پر 11.56 فیصد، چھ ماہ کے سرٹیفکیٹس پر 11.90 فیصد اور ایک سالہ سرٹیفکیٹس پر 12.14 فیصد منافع مقرر کیا گیا ہے۔
عام قومی بچت اکاؤنٹس پر منافع کی شرح 10.50 فیصد رکھی گئی ہے۔
اسلامی بچت اسکیموں کے حوالے سے بھی نئی شرحیں جاری کی گئی ہیں۔ سروا اسلامی ٹرم اکاؤنٹ کے ایک سالہ منصوبے پر منافع 12.04 فیصد مقرر کیا گیا ہے، جبکہ سروا اسلامی ٹرم سرٹیفکیٹ کے تین سالہ منصوبے پر شرح 11.98 فیصد ہوگی۔
اسی طرح سروا اسلامی ٹرم سرٹیفکیٹ کے پانچ سالہ منصوبے پر منافع 12.12 فیصد برقرار رکھا گیا ہے، جبکہ سروا اسلامی سیونگ اکاؤنٹ کے لیے متوقع منافع کی شرح 12.04 فیصد مقرر کی گئی ہے۔
قومی بچت اسکیموں کی نئی شرحوں کے پیش نظر سرمایہ کاروں کو مشورہ دیا گیا ہے کہ وہ سرمایہ کاری کا فیصلہ کرنے سے پہلے مختلف اسکیموں کی مدت، منافع اور متعلقہ شرائط کا بغور جائزہ لیں۔









