کیا سرخ لیزر پوائنٹر اسمارٹ فون کا کیمرا خراب کرسکتا ہے؟

اسمارٹ فون کا کیمرا روزمرہ زندگی میں تصاویر اور ویڈیوز بنانے کے لیے استعمال ہوتا ہے، تاہم بعض ایسی چیزیں بھی ہیں جو اس کے حساس امیج سینسر کو نقصان پہنچا سکتی ہیں۔ ان میں لیزر پوائنٹر کی روشنی بھی شامل ہے۔

ماہرین کے مطابق کھلونا لیزر پوائنٹر سے نکلنے والی شعاع بھی اسمارٹ فون کے کیمرے کے لیے نقصان دہ ثابت ہوسکتی ہے۔ نقصان کا انحصار لیزر کی طاقت، شعاع کے فوکس اور کیمرے کے سینسر پر پڑنے والی روشنی کے دورانیے پر ہوتا ہے۔

اسمارٹ فون کیمروں میں نصب امیج سینسر روشنی کو برقی سگنلز میں تبدیل کرکے تصویر تیار کرتا ہے۔ اگر لیزر کی تیز اور مرتکز شعاع براہ راست اس سینسر پر پڑے تو اس کے بعض پکسلز مستقل طور پر متاثر ہوسکتے ہیں۔

اس نقصان کے نتیجے میں تصاویر میں رنگین نقطے، لکیریں یا سیاہ اور سفید دھبے دکھائی دے سکتے ہیں۔ بعض صورتوں میں کیمرے کا ایک مخصوص حصہ بھی کام کرنا چھوڑ سکتا ہے۔

ماہرین کا کہنا ہے کہ کم طاقت والے سرخ لیزر پوائنٹر سے نقصان کا امکان نسبتاً کم ہوسکتا ہے، تاہم اسے مکمل طور پر محفوظ نہیں سمجھنا چاہیے۔ سبز اور زیادہ طاقت والے لیزر سے بھی خصوصی احتیاط ضروری ہے۔

قابل ذکر بات یہ ہے کہ کیمرے کا استعمال نہ ہونے کے باوجود بھی لیزر کی شعاع امیج سینسر کو متاثر کرسکتی ہے، اس لیے صرف کیمرا ایپ بند کرنا کافی تحفظ نہیں ہے۔

والدین کو چاہیے کہ بچوں کو لیزر پوائنٹرز کے غیر محتاط استعمال سے روکیں اور انہیں واضح طور پر سمجھائیں کہ لیزر کی روشنی اسمارٹ فون کے کیمرے یا کسی بھی شخص کی آنکھوں کی طرف نہ ڈالیں۔

احتیاطی تدابیر

– لیزر پوائنٹر کو کبھی بھی اسمارٹ فون کے کیمرے کی طرف نہ کریں۔
– بچوں کو لیزر پوائنٹرز صرف بڑوں کی نگرانی میں استعمال کرنے دیں۔
– لیزر کی روشنی براہ راست کسی کی آنکھ میں ڈالنے سے گریز کریں۔
– کیمرے کی حفاظت کے لیے لیزر شعاعوں سے مناسب فاصلہ رکھیں۔

یاد رہے کہ بظاہر معمولی دکھائی دینے والا کھلونا لیزر پوائنٹر بھی غلط استعمال کی صورت میں مہنگے اسمارٹ فون کے کیمرے کو مستقل نقصان پہنچا سکتا ہے۔