سلمان خان کو اپنے بیڈروم میں پراسرار موجودگی کا احساس، دلچسپ واقعہ سنا دیا

ممبئی: بالی وڈ کے معروف اداکار سلمان خان نے اپنے خاندانی گھر گلیکسی اپارٹمنٹس میں پیش آنے والے چند حیران کن واقعات کا ذکر کرتے ہوئے بتایا کہ انہیں اپنے بیڈروم میں اکثر کسی نامعلوم موجودگی کا احساس ہوتا تھا۔

بھارتی فلم ساز کرن جوہر کے چیٹ شو ’کافی ود کرن‘ میں گفتگو کے دوران سلمان خان نے اپنے کمرے سے متعلق ایک دلچسپ واقعہ بیان کیا۔ ان کے مطابق کمرے میں موجود ہوتے ہوئے انہیں کبھی مکمل تنہائی کا احساس نہیں ہوا، حالانکہ انہوں نے اس پراسرار موجودگی کو کبھی اپنی آنکھوں سے نہیں دیکھا۔

گفتگو میں کرن جوہر نے ماضی کا ایک واقعہ یاد کیا، جب وہ اپنی فلم ’کچھ کچھ ہوتا ہے‘ کا اسکرپٹ سنانے سلمان خان کے گھر گئے تھے۔ اس وقت اداکار اپنی فلم ’جب پیار کسی سے ہوتا ہے‘ کی شوٹنگ میں مصروف تھے، جس کے باعث انہوں نے فلم ساز کو گھر آنے کی دعوت دی تھی۔

کرن جوہر نے بتایا کہ اس دور میں سلمان خان اپنے خاندان کے دیگر افراد کے ساتھ ایک ہی گھر میں رہتے تھے اور ان کا کمرہ بھی خاصا چھوٹا تھا، جہاں ایک بستر، الماری اور چند ضروری اشیا موجود تھیں۔

اس موقع پر سلمان خان نے اپنے کمرے کے حوالے سے بتایا کہ وہاں بعض اوقات لائٹس خودبخود جلنے اور بجھنے لگتی تھیں، الماری کھل جاتی تھی اور موسیقی بھی اچانک بجنے لگتی تھی۔ اداکار کے مطابق انہیں کبھی کبھار باتھ روم میں موجود ہونے کے دوران بھی باہر کسی کی موجودگی کا احساس ہوتا تھا۔

سلمان خان نے بتایا کہ یہ کیفیت انہیں خوف زدہ نہیں کرتی تھی، کیونکہ ان کے بقول اس نامعلوم موجودگی نے کبھی انہیں کوئی نقصان نہیں پہنچایا۔ وہ بعض اوقات مذاق میں اس سے پوچھتے کہ اسے کون سا گانا پسند ہے اور پھر موسیقی چلا کر کمرے سے باہر نکل جاتے تھے۔

اداکار نے گفتگو کے دوران مزاحیہ انداز بھی اختیار کیا اور کہا کہ اگر وہاں واقعی کوئی خوبصورت خاتون موجود تھی تو وہ سامنے آکر اپنا تعارف کرا دے۔

سلمان خان کی اس بات پر کرن جوہر بھی ہنس پڑے اور گفتگو کا ماحول خوشگوار ہوگیا۔

واضح رہے کہ یہ واقعہ اداکار کی جانب سے بیان کردہ ذاتی تجربے پر مبنی ہے۔ اس پراسرار موجودگی یا مبینہ واقعات کی آزادانہ تصدیق سامنے نہیں آئی۔