دادی کا وہ راز جو کرشمہ کپور آج تک نہیں بھولیں

بالی ووڈ اداکارہ کرشمہ کپور نے اپنی دادی اور نانی سے جڑی خوبصورتی کی یادیں شیئر کرتے ہوئے بتایا کہ ان کی شخصیت پر دونوں کا گہرا اثر رہا ہے۔ ان کے مطابق اس دور میں خوبصورتی کے لیے سادہ گھریلو طریقوں کو خاص اہمیت دی جاتی تھی۔
کرشمہ نے بتایا کہ ان کی دادی گھی کو صرف کھانے تک محدود نہیں رکھتی تھیں بلکہ اسے چہرے پر بھی استعمال کرتی تھیں۔ ان کی دادی شوخ رنگ کی لپ اسٹک لگانے کی بھی شوقین تھیں، جس کا انداز کرشمہ کے مطابق انہیں بھی پسند آیا۔
اداکارہ نے اپنی نانی کے اسٹائل کا ذکر کرتے ہوئے کہا کہ وہ شیفون کی ساڑھی، موتیوں کے ہار اور ہلکے رنگ کی لپ اسٹک کے ساتھ انتہائی خوبصورت دکھائی دیتی تھیں۔ دونوں کا انداز مختلف تھا، تاہم سادگی ان کی شخصیت کا نمایاں حصہ تھی۔
90 کی دہائی کے فلمی میک اپ کے بارے میں بات کرتے ہوئے کرشمہ نے کہا کہ وقت کے ساتھ فلموں کی روشنی، ٹیکنالوجی، لباس اور میک اپ کے انداز میں نمایاں تبدیلیاں آئی ہیں۔ تاہم انہیں اس دور کے بیوٹی ٹرینڈز آج بھی پسند ہیں۔
کرشمہ کے مطابق براؤن لپ اسٹک اور برونزر ان کے پسندیدہ 90 کی دہائی کے رجحانات میں شامل ہیں اور وہ آج بھی ان رنگوں کو استعمال کرنا پسند کرتی ہیں۔ ان کا کہنا تھا کہ فیشن اور بیوٹی ٹرینڈز بدلتے رہتے ہیں، لیکن بعض پرانے انداز دوبارہ مقبول ہو جاتے ہیں۔