کیا ’ڈان 3‘ میں امیتابھ بچن اور شاہ رخ خان بھی نظر آئیں گے؟

بالی وُڈ کی مشہور زمانہ ایکشن تھرلر فرنچائز “ڈان” ایک بار پھر شائقین کی توجہ کا مرکز بن گئی ہے۔ تازہ اطلاعات کے مطابق “ڈان 3” کے لیے نہ صرف نئے ہیرو رنویر سنگھ کی کاسٹنگ ہو چکی ہے، بلکہ فلم ساز اس بار کچھ خاص سرپرائزز کی تیاری بھی کر رہے ہیں۔

ذرائع کا کہنا ہے کہ فلم کے ہدایتکار فرحان اختر نے ماضی میں ’ڈان‘ کا کردار ادا کرنے والے دو بڑے اداکاروں، امیتابھ بچن اور شاہ رخ خان، کو بھی فلم کا حصہ بنانے کی پیشکش کی ہے۔ اگر یہ دونوں اداکار شامل ہوتے ہیں تو یہ پہلی بار ہوگا کہ ڈان فرنچائز کی تینوں نسلیں—امیتابھ، شاہ رخ اور رنویر—ایک ہی فلم میں جلوہ گر ہوں گی۔

1978 میں ریلیز ہونے والی اصل فلم میں امیتابھ بچن نے “ڈان” کا کردار ادا کیا تھا، جو سلیم-جاوید کی تحریر اور چندر باروٹ کی ہدایت کاری کا شاہکار تھی۔ بعد ازاں 2006 میں اس فلم کا ری میک بنایا گیا، جس میں شاہ رخ خان نے مرکزی کردار نبھایا، اور پھر 2011 میں “ڈان 2” کے ذریعے اس کہانی کو مزید آگے بڑھایا گیا۔

اب فرحان اختر ایک نئی کہانی کے ساتھ “ڈان 3” کے ذریعے فرنچائز کو دوبارہ زندہ کرنے جا رہے ہیں، اور رنویر سنگھ کو اس بار نئے “ڈان” کے طور پر پیش کیا جا رہا ہے۔ ایک انٹرویو میں فرحان نے بتایا کہ وہ ایک نئے انداز اور نسل کو سامنے لانا چاہتے تھے، اسی لیے رنویر کو منتخب کیا گیا۔

حالانکہ امیتابھ بچن اور شاہ رخ خان کی شمولیت کی تاحال باضابطہ تصدیق نہیں ہوئی، مگر فلمی شائقین اس خبر پر پرجوش ہیں۔ اگر یہ ممکن ہوتا ہے، تو بلاشبہ “ڈان 3” بھارتی سنیما کی ایک تاریخی فلم بن سکتی ہے۔