کریم آبادانڈر پاس پانی سےبھرگیا، تعمیراتی منصوبہ مزیدتاخیرکاشکار

کراچی کے علاقے کریم آباد میں زیرِ تعمیر انڈر پاس حالیہ بارش کے باعث پانی سے بھر گیا، جس سے نہ صرف شہریوں کو آمدورفت میں شدید مشکلات کا سامنا ہے بلکہ منصوبے کی تکمیل میں مزید تاخیر کا امکان بھی ظاہر کیا جا رہا ہے۔

منصوبہ جون 2023 میں شروع ہوا تھا اور اس کی ابتدائی لاگت تقریباً 1.35 ارب روپے مقرر کی گئی تھی، تاہم مختلف رکاوٹوں کی وجہ سے اب لاگت 3.8 ارب روپے سے تجاوز کر چکی ہے۔ حکام کے مطابق زیر زمین گیس لائن کی تبدیلی، پانی کی مرکزی لائن، اور دیگر یوٹیلٹی مسائل کی وجہ سے منصوبہ سست روی کا شکار رہا ہے۔

حالیہ بارشوں کے بعد زیر تعمیر مقام پر پانی جمع ہونے سے نہ صرف تعمیراتی کام معطل ہو گیا ہے بلکہ مقامی آبادی اور کاروباری حضرات کو بھی مشکلات کا سامنا ہے۔ ٹریفک کی روانی شدید متاثر ہوئی ہے جبکہ علاقے میں صفائی اور روشنی کے ناقص انتظامات کی بھی شکایات سامنے آئی ہیں۔

شہری انتظامیہ کے مطابق گیس پائپ لائن کی منتقلی میں 4 سے 6 دن کی تاخیر متوقع ہے، تاہم کوشش کی جا رہی ہے کہ منصوبہ ایک ہفتے کے اندر دوبارہ بحال کر دیا جائے۔

ادھر شہری حلقوں نے مطالبہ کیا ہے کہ بارش سے پہلے نالوں کی صفائی، تعمیراتی مقامات پر حفاظتی اقدامات، اور متبادل راستوں کی منصوبہ بندی کو یقینی بنایا جائے تاکہ شہریوں کو مزید پریشانی کا سامنا نہ ہو۔