ڈاکٹر نبیحہ علی خان نے حارث کھوکھر کے ساتھ نکاح کر لیا

معروف کلینیکل سائیکالوجسٹ اور سابق نیوز اینکر ڈاکٹر نبیحہ علی خان نے اپنے قریبی دوست اور ساتھی حارث کھوکھر کے ساتھ شادی کے بندھن میں بندھ گئیں۔

نکاح کی تقریب انتہائی سادگی سے منعقد ہوئی اور یہ تقریب مولانا طارق جمیل کی رہائش گاہ پر ہوئی، جہاں مولانا صاحب نے خود نکاح پڑھایا۔ اس موقع پر چند قریبی دوست، میڈیا کے نمائندے اور مشہور شخصیات نے شرکت کی، جن میں معروف اداکارہ فرح اقرار بھی شامل تھیں۔

ڈاکٹر نبیحہ علی خان نے اپنی شادی کے لیے معروف ڈیزائنر حنا سلمان کا تیار کردہ آف وائٹ رنگ کا عروسی لباس منتخب کیا، جس کی قیمت تقریباً ایک کروڑ روپے بتائی جا رہی ہے۔ ان کے جیولری سیٹ کی مالیت بھی اسی حد کے لگ بھگ ہے۔ دلہا حارث کھوکھر نے بھی آف وائٹ شیروانی اور قلا پہن کر دلہن کے ساتھ ٹوئننگ کی، جس کی تصاویر اور ویڈیوز سوشل میڈیا پر تیزی سے وائرل ہو گئی ہیں۔

ڈاکٹر نبیحہ نے بتایا کہ وہ بالکل نہیں جانتی تھیں کہ مولانا طارق جمیل خود نکاح پڑھائیں گے اور یہ سب کچھ اچانک طے پایا۔ ان کے مطابق، مولانا صاحب نے خود خواہش ظاہر کی کہ وہ دو دن کے اندر نکاح کی تقریب میں شرکت کریں گے۔

دلہن نے بتایا کہ ولیمہ کی تقریب ایک ماہ بعد منعقد ہوگی، جسے وہ “سوشل میڈیا کی سب سے وائرل شادی” قرار دے رہی ہیں۔ شادی کی خبر کے بعد انسٹاگرام اور فیس بک پر مداحوں کی جانب سے جوڑے کے لیے خوشیوں اور کامیابیوں کی دعاؤں کا سلسلہ شروع ہو گیا ہے۔

اکتوبر 2025 میں دیے گئے ایک انٹرویو میں ڈاکٹر نبیحہ علی خان نے بتایا تھا کہ انہوں نے اپنی پہلی شادی ایک ایسے شخص سے کی تھی جو ان سے 15 سال بڑے تھے، اور شوہر کے انتقال کے بعد انہوں نے دوبارہ شادی نہیں کی۔ انہوں نے مزید کہا کہ اب انہیں بیس سال کی عمر جیسی محبت ملی ہے اور وہ ایک نئی زندگی کا آغاز کرنے کے لیے بے حد خوش ہیں۔