پیٹریاٹ انٹرسیپٹرز کی قلت، یوکرین کی فضائی دفاعی صلاحیت کو بڑا خطرہ

یوکرین کو روسی بیلسٹک میزائلوں کے خلاف استعمال ہونے والے پیٹریاٹ انٹرسیپٹرز کی شدید کمی کا سامنا ہے، جس سے ملک کی فضائی دفاعی صلاحیت متاثر ہونے کا خدشہ بڑھ گیا ہے۔

امریکی میڈیا رپورٹس کے مطابق یوکرین کے پاس موجود پیٹریاٹ انٹرسیپٹرز کی تعداد انتہائی کم رہ گئی ہے۔ صدر ولودیمیر زیلنسکی کا کہنا ہے کہ موسم سرما میں روسی حملوں سے نمٹنے کے لیے یوکرین کو امریکی ذخیرے کے کم از کم پانچ فیصد کے برابر انٹرسیپٹرز درکار ہوں گے، جبکہ اس وقت دستیاب مقدار تقریباً ایک فیصد ہے۔

پیٹریاٹ دفاعی نظام میں لانچرز کے علاوہ ریڈار، کمانڈ سینٹر اور دیگر اہم آلات شامل ہوتے ہیں۔ اس نظام کے ذریعے آنے والے میزائلوں کی نشاندہی اور انہیں روکنے کے لیے مناسب وقت پر انٹرسیپٹر فائر کیا جاتا ہے۔

ایک یوکرینی پیٹریاٹ یونٹ کے چیف انجینئر کے مطابق دسمبر 2025 میں پہلی مرتبہ ان کے یونٹ کے پاس فائر کرنے کے لیے کوئی انٹرسیپٹر دستیاب نہیں تھا۔ ان کا کہنا ہے کہ روسی میزائل شہری علاقوں کی طرف بڑھ رہے ہوں اور انہیں روکنے کے لیے مطلوبہ میزائل موجود نہ ہوں تو یہ صورتحال انتہائی تشویش ناک ہے۔

پیٹریاٹ انٹرسیپٹرز کی عالمی طلب میں بھی اضافہ ہوا ہے۔ رپورٹس کے مطابق ایران کے ساتھ حالیہ جنگ کے دوران اتحادی افواج نے ابتدائی چار دنوں میں اوسطاً روزانہ 225 انٹرسیپٹرز استعمال کیے، جو موجودہ پیداواری رفتار کے مقابلے میں بہت زیادہ ہے۔

پیٹریاٹ انٹرسیپٹرز بنانے والی لاک ہیڈ مارٹن نے 2025 میں تقریباً 620 میزائل تیار کیے۔ تاہم امریکی محکمہ دفاع نے رواں سال کمپنی کے ساتھ سات سالہ معاہدہ کیا ہے، جس کا مقصد 2030 تک سالانہ پیداوار کو تقریباً 2 ہزار انٹرسیپٹرز تک پہنچانے کی صلاحیت پیدا کرنا ہے۔

یوکرین اس مسئلے کا طویل مدتی حل ملکی سطح پر پیداوار کے ذریعے تلاش کرنا چاہتا ہے۔ زیلنسکی کے مطابق انہوں نے امریکی کمپنیوں ریتھیون اور لاک ہیڈ مارٹن کو یوکرین میں پیٹریاٹ انٹرسیپٹرز کی تیاری کے لیے پلانٹ قائم کرنے کی تجویز دی ہے۔

تاہم امریکی حکام کے مطابق یوکرین میں پیٹریاٹ انٹرسیپٹرز کی تیاری کے حوالے سے ابھی کوئی حتمی فیصلہ یا ضمانت موجود نہیں۔ امریکی ٹیکنالوجی اور حساس معلومات کا تحفظ بھی اس معاملے میں اہم رکاوٹ ہے۔

ماہرین کے مطابق پیٹریاٹ جیسے جدید دفاعی نظام کی مقامی پیداوار شروع کرنا فوری عمل نہیں ہوگا، کیونکہ اس کے لیے پیچیدہ ٹیکنالوجی، خصوصی مہارت، بنیادی ڈھانچے اور طویل مدتی صنعتی تعاون کی ضرورت ہوتی ہے۔ یوں فوری ضرورت پوری کرنے کے لیے یوکرین کو بیرونی سپلائی پر انحصار برقرار رکھنا پڑ سکتا ہے۔