پہلا ای چالان معاف، دوبارہ خلاف ورزی پر جرمانہ لازم ہوگا: وزیراعلیٰ سندھ

کراچی: وزیراعلیٰ سندھ سید مراد علی شاہ نے اعلان کیا ہے کہ ای چالان سسٹم کے تحت شہریوں کا پہلا چالان معاف کیا جائے گا، تاہم ٹریفک قوانین کی دوبارہ خلاف ورزی کی صورت میں جرمانہ لازمی ادا کرنا ہوگا۔

ترجمان کے مطابق وزیراعلیٰ سندھ سے آئی جی سندھ غلام نبی میمن نے ملاقات کی، جس میں ای ٹکٹنگ سسٹم سے متعلق رپورٹ پیش کی گئی۔ رپورٹ میں بتایا گیا کہ پولیس نے 35 سرکاری گاڑیوں کے چالان کیے ہیں، جن میں سیٹ بیلٹ نہ باندھنے، ریڈ سگنل توڑنے، ٹینٹڈ گلاسز اور ڈرائیونگ کے دوران موبائل فون استعمال کرنے کی خلاف ورزیاں شامل ہیں۔

مراد علی شاہ نے کہا کہ ٹریفک قوانین پر عملدرآمد شہریوں کی اپنی حفاظت کے لیے ضروری ہے۔ انہوں نے ہدایت دی کہ پہلا چالان معاف کیا جائے، مگر دوبارہ خلاف ورزی کرنے والوں کو جرمانہ ادا کرنا ہوگا۔

آئی جی سندھ نے مزید بتایا کہ اگر کسی شہری کا پہلی مرتبہ ای چالان ہوا ہے تو وہ 10 دن کے اندر متعلقہ حکام سے رابطہ کر کے معافی حاصل کر سکتا ہے۔

رپورٹ کے مطابق ای ٹکٹنگ سسٹم کے تحت پہلا چالان 28 اکتوبر کو لیاری ایکسپریس وے پر ایک سرکاری گاڑی کے خلاف سیٹ بیلٹ کی خلاف ورزی پر کیا گیا۔

وزیراعلیٰ سندھ نے اس موقع پر کہا کہ جدید ای ٹکٹنگ سسٹم قانون کی بالادستی یقینی بنانے میں اہم کردار ادا کر رہا ہے، اور پولیس سمیت کوئی بھی قانون سے بالاتر نہیں۔