پرائیویٹ اسکیم کے تحت حج کی سعادت کا نیا موقع، آج سے درخواستیں جمع ہوں گی

وزارت مذہبی امور نے اعلان کیا ہے کہ پرائیویٹ حج اسکیم 2025 کے تحت عازمینِ حج آج سے اپنی درخواستیں جمع کرا سکتے ہیں۔ اس سال مجموعی طور پر 60 ہزار افراد پرائیویٹ اسکیم کے تحت حج کی سعادت حاصل کر سکیں گے۔

وزارت کے مطابق، گزشتہ سال پرائیویٹ حج سے محروم رہ جانے والے 22 ہزار 97 عازمین پہلے ہی رجسٹرڈ ہیں اور انہیں ترجیح دی جائے گی۔ اس کے علاوہ 37 ہزار 903 نئے عازمین کے لیے بھی درخواستوں کی گنجائش رکھی گئی ہے۔

حکام کا کہنا ہے کہ تمام پرائیویٹ حج آپریٹرز کو پابند کیا گیا ہے کہ وہ پچھلے سال رہ جانے والے عازمین کو پہلے موقع دیں، اور رجسٹریشن مکمل ہونے کا بیان حلفی بھی جمع کرائیں۔

وزارت مذہبی امور کے مطابق، پرائیویٹ ٹور آپریٹرز کا کل کوٹہ 60 ہزار ہے، جس میں گزشتہ سال کے عازمین بھی شامل ہیں۔