پاکستان میں سال 2026 کا پہلا مکمل چاند گرہن

آج پاکستان میں سال 2026 کا پہلا مکمل چاند گرہن دیکھنے کو ملے گا۔ محکمہ موسمیات کے مطابق گرہن کا آغاز دوپہر 1 بجکر 44 منٹ پر ہوگا، جبکہ چاند پر گرہن اثر انداز ہونا دوپہر 2 بجکر 50 منٹ سے شروع ہوگا۔
مکمل گرہن شام 4 بجکر 5 منٹ پر شروع ہوگا اور شام 5 بجکر 45 منٹ پر اپنے عروج پر پہنچے گا۔ یہ مظاہرہ شام 6 بجکر 17 منٹ پر اختتام کو پہنچے گا۔ پاکستان میں چاند طلوع ہونے کے وقت یہ گرہن جزوی طور پر دیکھا جا سکے گا۔ رات 7 بجکر 23 منٹ پر مکمل طور پر اختتام ہوگا۔
یہ فلکیاتی مظاہرہ عام طور پر ’بلڈ مون‘ کے نام سے جانا جاتا ہے۔ چاند گرہن اس وقت ہوتا ہے جب زمین، سورج اور چاند ایک سیدھی لائن میں آ جاتے ہیں، اور زمین سورج کی روشنی کو چاند تک پہنچنے سے روکتی ہے۔ بعض اوقات زمین کے ماحول سے گزرنے والی روشنی چاند تک پہنچ کر اسے سرخ یا سنہری رنگ عطا کرتی ہے۔
پاکستان کے علاوہ مشرقی بھارت اور آندامان و نکوبار جزائر کے کچھ حصے مکمل گرہن کے اختتام سے قبل اسے دیکھنے کے اہل ہوں گے۔ بحرالکاہل، نیوزی لینڈ، آسٹریلیا، مشرقی ایشیا اور مغربی شمالی امریکا میں بھی یہ فلکیاتی مظاہرہ بہترین انداز میں دیکھا جا سکے گا، جبکہ یورپ اور افریقہ کے بیشتر حصوں میں چاند افق کے نیچے ہونے کی وجہ سے یہ نظر نہیں آئے گا۔
یہ موقع فلکیات کے شائقین اور عام لوگوں دونوں کے لیے زمین کے سائے میں ڈھکے چاند کا خوبصورت منظر دیکھنے کا شاندار تجربہ فراہم کرے گا۔