پاکستان شاہینز کا شاندار کارنامہ ، ایشیا کپ رائزنگ اسٹارز ٹی ٹوئنٹی کا ٹائٹل اپنے نام

دوحہ میں کھیلے گئے ایشیا کپ رائزنگ اسٹارز ٹی ٹوئنٹی کے سنسنی خیز فائنل میں پاکستان شاہینز نے بنگلادیش اے کو سپر اوور میں شکست دے کر چیمپئن بننے کا اعزاز حاصل کرلیا۔

مقررہ 20 اوورز میں دونوں ٹیموں نے 125، 125 رنز بنا کر میچ برابر کر دیا، جس کے بعد فیصلہ سپر اوور پر منتقل ہوا۔ سپر اوور میں پاکستانی بولرز نے شاندار کارکردگی دکھاتے ہوئے بنگلادیش اے کو صرف 6 رنز تک محدود کردیا۔ جواب میں پاکستان شاہینز نے انتہائی اعتماد کے ساتھ 7 رنز کا ہدف صرف چار گیندوں میں حاصل کرکے ٹرافی اپنے نام کرلی۔

اس سے قبل ٹاس جیت کر بنگلادیش اے نے پاکستان کو بیٹنگ کی دعوت دی۔ مشکل وکٹ پر پاکستانی بیٹرز نے 125 رنز کا مجموعہ ترتیب دیا، جس میں سعد مسعود 38 رنز کے ساتھ نمایاں رہے، جبکہ عرفات منہاس نے 25 اور معاذ صداقت نے 23 رنز کی اننگز کھیلیں۔ بنگلادیش کی جانب سے رپون منڈل تین وکٹوں کے ساتھ سب سے کامیاب بولر رہے۔

ہدف کے تعاقب میں بنگلادیش اے کی ٹیم بھی پاکستانی بولنگ کے سامنے مشکلات کا شکار رہی۔ شاہینز کے بولرز نے مسلسل دباؤ قائم رکھا اور حریف ٹیم کو اٹھارہ اوورز میں 96 رنز پر 9 وکٹوں سے محروم کردیا۔ آخری اوورز میں مقابلہ دلچسپ صورتحال اختیار کرگیا، تاہم احمد دانیال کی نپی تلی بولنگ نے بنگلادیش کو 125 رنز تک محدود رکھا۔

میچ ٹائی ہونے کے بعد ہونے والا سپر اوور فیصلہ کن ثابت ہوا، جس میں پاکستان شاہینز نے بہترین کارکردگی کے ساتھ ٹائٹل پر قبضہ جما لیا۔