پاکستانی ٹک ٹاک اسٹار عائشہ اظہر کا بالی ووڈ میں کام سے انکار

سوشل میڈیا پر راتوں رات شہرت پانے والی پاکستانی ٹک ٹاک شخصیت عائشہ اظہر نے حالیہ انٹرویو میں انکشاف کیا ہے کہ انہیں بھارتی فلم انڈسٹری میں کام کی تجاویز ملیں، مگر انہوں نے انہیں قبول نہیں کیا۔

عائشہ اظہر کی مقبولیت کا آغاز 2022 میں اس وقت ہوا جب ایک شادی کی تقریب میں ان کا گانے “میرا دل یہ پکارے آجا” پر ڈانس وائرل ہوگیا۔ یہ ویڈیو نہ صرف پاکستان بلکہ دنیا بھر میں موضوعِ گفتگو بنی اور متعدد معروف فنکاروں نے بھی اس پرفارمنس کو دوبارہ پیش کیا۔

ایک ٹی وی پروگرام میں گفتگو کرتے ہوئے انہوں نے بتایا کہ وائرل ویڈیو کے بعد انہیں پاکستان اور بھارت دونوں جگہ سے بڑی پذیرائی ملی۔ کئی بھارتی فنکاروں نے انہیں بالی ووڈ میں کام کا مشورہ دیا، تاہم انہوں نے ذاتی خدشات کے باعث اس پیشکش کو ٹھکرا دیا۔ ان کا کہنا تھا کہ گھر والوں کی اجازت موجود تھی، مگر وہ خود اس حوالے سے مطمئن نہیں تھیں۔

اپنی تعلیم کے حوالے سے عائشہ نے بتایا کہ وہ ابھی فیصلہ نہیں کرپائیں کہ پڑھائی جاری رکھیں یا ماڈلنگ پر بھرپور توجہ دیں۔ انہوں نے اعتراف کیا کہ تعلیمی سفر ان کے لیے قدرے مشکل رہا اور میٹرک پاس کرنے میں انہیں کئی کوششیں کرنا پڑیں۔

عائشہ اظہر اس وقت ٹک ٹاک، انسٹاگرام اور دیگر سوشل میڈیا پلیٹ فارمز پر فعال ہیں اور ماڈلنگ کو اپنا مستقل کیریئر بنانے کے لیے پرعزم دکھائی دیتی ہیں۔