ٹوبہ ٹیک سنگھ میں ایک افسوسناک واقعہ پیش آیا ہے جہاں صوبائی اسمبلی کے رکن (ایم پی اے) کرنل ریٹائرڈ ایوب خان گادھی کے ڈیرے پر نامعلوم مسلح افراد نے فائرنگ کر دی۔ اس حملے میں 4 افراد موقع پر ہی جان کی بازی ہار گئے جبکہ ایم پی اے ایوب گادھی سمیت 3 افراد زخمی ہو گئے۔
واقعے کے فوراً بعد زخمیوں اور لاشوں کو قریبی اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔ خاندانی ذرائع کے مطابق ایم پی اے ایوب گادھی کو ابتدائی علاج کے بعد ٹوبہ ٹیک سنگھ کے ڈی ایچ کیو اسپتال سے لاہور کے سروسز اسپتال منتقل کیا جا رہا ہے۔
فائرنگ کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیے۔ سیکیورٹی ادارے مختلف زاویوں سے واقعے کی تحقیقات کر رہے ہیں۔
آئی جی پنجاب نے واقعے کا نوٹس لیتے ہوئے فوری رپورٹ طلب کر لی ہے۔ اسی طرح آر پی او فیصل آباد سہیل اختر سکھیرا اسپتال پہنچے، جہاں انہوں نے زخمیوں کی عیادت کی اور صورتحال سے متعلق معلومات حاصل کیں۔
انہوں نے یقین دہانی کرائی ہے کہ واقعے میں ملوث افراد کو جلد گرفتار کر کے قانون کے مطابق کارروائی کی جائے گی۔ ڈی پی او ٹوبہ ٹیک سنگھ کو بھی ہدایت جاری کی گئی ہے کہ ملزمان کی فوری گرفتاری یقینی بنائی جائے۔
پولیس حکام کا کہنا ہے کہ واقعے کی ہر پہلو سے تفتیش جاری ہے تاکہ حملے کی وجوہات اور ذمہ داروں کا تعین کیا جا سکے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔