نوٹنگھم کی کاروباری خاتون گفٹ کارڈ کی وجہ سے دنیا کی امیر ترین خاتون بن گئیں

برطانیہ کے شہر نوٹنگھم کی کاروباری خاتون، 29 سالہ صوفی ڈاؤننگ، اس وقت حیران رہ گئیں جب ان کے کرسمس کے تحفے کے گفٹ کارڈ پر ایک غیر متوقع رقم ظاہر ہوئی۔
صوفی کو کافی شاپ ’ڈگری کافی 200‘ کا 10 پاؤنڈ کا گفٹ کارڈ ملا تھا۔ جب انہوں نے 12 فروری کو اس کارڈ سے ایک میچا لیٹے کافی خریدی، تو رسید پر رقم دیکھ کر وہ چونک گئی۔ رسید پر ظاہر شدہ رقم 63 کوآڈریلن پاؤنڈ تھی، جس کا حساب تقریباً ایلون مسک کی دولت سے بھی ایک لاکھ گنا زیادہ تھا۔
صوفی نے بتایا کہ یہ دیکھ کر انہیں بہت ہنسی آئی اور کافی شاپ کے ملازم بھی حیران رہ گئے۔ انہوں نے رسید اپنے ساتھی کو بھی دکھائی جسے یہ واقعہ دلچسپ لگا۔
بعد میں کافی شاپ انتظامیہ نے وضاحت کی کہ یہ سب ایک تکنیکی اور انتظامی غلطی کی وجہ سے ہوا۔ گفٹ کارڈ میں رقم ڈالنے کے بجائے غلطی سے کارڈ کا نمبر ہی رقم کے طور پر درج ہو گیا تھا۔ حقیقت میں صارف سے صرف صحیح رقم ہی کاٹی گئی تھی اور گفٹ کارڈ میں اصل رقم موجود رہی۔
صوفی نے کہا کہ انہوں نے اس غلطی کا کوئی فائدہ نہیں اٹھایا اور گفٹ کارڈ ذمہ داری کے ساتھ استعمال کر رہی ہیں۔ یہ واقعہ سوشل میڈیا پر صارفین میں حیرت اور دلچسپی کا باعث بنا۔