مہندی کے انتخاب میں محتاط رہنے کی ہدایت

عید الفطر کی آمد کے ساتھ خواتین کی تیاریوں میں کپڑے، جیولری، چوڑیاں اور مہندی ایک اہم حصہ بن چکے ہیں۔ خاص طور پر چاند رات کو مہندی لگانے کا اہتمام کیا جاتا ہے، اور بہت سی خواتین پہلے ہی اپائنٹمنٹ کروا چکی ہیں۔
مہندی ایک قدیم فن ہے جو صدیوں سے خوشیوں کے جشن کا حصہ رہی ہے، مگر ماہرین جلد نے خبردار کیا ہے کہ جدید سیاہ اور سفید مہندی میں شامل کیمیکلز جلد کے لیے نقصان دہ ہو سکتے ہیں۔
سیاہ اور سفید مہندی میں خطرہ
اصل مہندی نارنجی یا بھوری رنگ کی ہوتی ہے۔ اکثر سیاہ مہندی میں پیرا فینیلین ڈیامین (PPD) شامل ہوتا ہے، جو بالوں کے رنگ میں پایا جاتا ہے۔ بالوں کے لیے یہ کیمیکل محدود مقدار میں محفوظ ہے، مگر بعض سیاہ یا سفید مہندی میں اس کا تناسب 10 سے 40 فیصد تک بڑھ سکتا ہے۔
ماہرین کا کہنا ہے کہ جلد پر زیادہ PPD لگانے سے سرخی، سوجن، چھالے، کیمیائی جلن اور داغ پڑ سکتے ہیں، اور بعض معاملات میں یہ اثرات مہینوں تک رہ سکتے ہیں۔
قدرتی مہندی کا فائدہ
قدرتی مہندی لاسونیا انرمس پودے سے حاصل کی جاتی ہے، جو جلد پر لگانے پر سرخ رنگ دیتی ہے اور چار یا پانچ دن میں دھل جاتی ہے۔ اس کا کوئی نقصان دہ اثر نہیں ہوتا۔
سفید مہندی جلد پر داغ نہیں ڈالتی اور PPD نہیں رکھتی، مگر یہ بھی مکمل طور پر محفوظ نہیں، کیونکہ اس میں دیگر مصنوعی کیمیکلز استعمال کیے جاتے ہیں۔
ماہرین کا مشورہ
ڈاکٹرز کا کہنا ہے کہ مہندی لگانے کے بعد اگر کسی قسم کا ردعمل ظاہر ہو تو فوراً ماہر جلد سے رجوع کریں، اور ممکن ہو تو ہمیشہ قدرتی مہندی کا انتخاب کریں۔