لاہور میں 346 عمارتیں خستہ حال، 92 خالی کروا دی گئیں

لاہور: والڈ سٹی اتھارٹی نے اندرون لاہور میں 300 سے زائد عمارتوں کو غیر محفوظ قرار دے دیا ہے۔
اتھارٹی نے لاہور ہائیکورٹ میں جمع کرائی گئی رپورٹ میں بتایا ہے کہ بسنت کے موقع پر خطرناک اور خستہ حال عمارتوں کا سروے مکمل کر لیا گیا ہے۔ رپورٹ کے مطابق مجموعی طور پر 346 عمارتیں خستہ حال ہیں جن میں سے 183 عمارتیں ناقابل مرمت قرار دی گئی ہیں اور 92 عمارتیں خالی کروا لی گئی ہیں۔
رپورٹ میں مزید بتایا گیا ہے کہ 254 خطرناک عمارتیں اب بھی آباد ہیں اور انہیں خالی نہیں کروایا جا سکا۔ آباد عمارتوں میں 103 ناقابل مرمت اور 151 قابل مرمت پائی گئی ہیں، جبکہ خالی کرائی گئی عمارتوں میں 80 عمارتیں مسمار کرنے کے قابل اور 12 عمارتیں قابل مرمت ہیں۔
اتھارٹی کا کہنا ہے کہ خطرناک عمارتوں کی چھتیں بسنت کی سرگرمیوں کے لیے محفوظ نہیں ہیں، اس لیے والڈ سٹی اتھارٹی نے وارننگ نوٹسز اور آگاہی بینرز نصب کر دیے ہیں۔