لاہور میں ایک اور نوجوان ہنی ٹریپ کا شکار

لاہور میں ہنی ٹریپ کا ایک اور واقعہ سامنے آیا ہے جہاں لڑکی نے نوجوان کو اپنے گھر بلایا اور ساتھیوں کے ساتھ مل کر مارا پیٹا اور اس کے اکاؤنٹ سے بھاری رقم منتقل کر لی۔

حمزہ نامی نوجوان کی کچھ عرصہ قبل ایک لڑکی سے دوستی ہوئی، جب وہ ایک دوسرے کو مزید جان گئے تو لڑکی نے کہا کہ ناشتہ لواور میرے فلیٹ پر آجاؤ۔ ناشتہ میز پر رکھا جا رہا تھا کہ 3 مسلح افراد بھی وہاں آئے اور حمزہ کو گن پوائنٹ پر پکڑ کر مارنے لگے ۔

تینوں افراد نوجوان کو تشدد کا نشانہ بناتے رہے اور لڑکی ویڈیو بناتی رہی، لڑکی نے حمزہ کا موبائل فون لے کر بینک اکاؤنٹ کا پاس ورڈ مانگا اور اس کے اکاؤنٹ میں 66 ہزار روپے منتقل کیے اور پھر قیمتی فون اور پرس چھین کر 14ہزار روپے نکال لیے۔

پولیس نے متاثرہ نوجوان کی شکایت پر مقدمہ درج کرکے لڑکی سمیت ہنی ٹریپ گینگ کے 3 ملزمان کو گرفتار کرلیا جبکہ ایک ملزم فرار ہوگیا، پولیس نے ملزمان سے ویڈیوز برآمد کرلیں جب کہ واقعے کی مزید تفتیش کی جارہی ہے۔