غزہ میں اسرائیلی فضائی حملے جاری، عمارتیں ملبے کا ڈھیر

غزہ کی پٹی میں اسرائیلی فضائی کارروائیاں شدت اختیار کر گئی ہیں، جہاں حالیہ دنوں میں بلند عمارتوں کو نشانہ بنانے کا سلسلہ تیز ہو گیا ہے۔ مقامی ذرائع کے مطابق، صرف ایک دن میں کم از کم 16 بڑی عمارتیں مکمل طور پر تباہ کر دی گئی ہیں۔

غزہ کی شہری دفاعی انتظامیہ کا کہنا ہے کہ ان حملوں کے نتیجے میں 6 ہزار سے زائد شہری بے گھر ہو چکے ہیں۔ متاثرہ خاندانوں کو عارضی پناہ گاہوں میں منتقل کیا جا رہا ہے، جہاں بنیادی سہولیات کی شدید قلت ہے۔

دوسری جانب، جاری جھڑپوں اور بمباری کے نتیجے میں فلسطینیوں کی ہلاکتوں کا سلسلہ بھی جاری ہے۔ اطلاعات کے مطابق گزشتہ 24 گھنٹوں کے دوران مزید 53 افراد جاں بحق ہوئے ہیں۔

فلسطینی وزارت صحت کے مطابق، اکتوبر 2023 سے اب تک مجموعی طور پر 64 ہزار 871 افراد شہید اور 1 لاکھ 64 ہزار 610 سے زائد زخمی ہو چکے ہیں۔

اسرائیل کے سابق آرمی چیف ہرزی حلیوی نے بھی ایک حالیہ بیان میں تسلیم کیا ہے کہ غزہ میں ہونے والی کارروائیوں کے نتیجے میں کم از کم دو لاکھ افراد یا تو شہید یا زخمی ہو چکے ہیں۔ ان کا کہنا تھا کہ غزہ کی 22 لاکھ کی آبادی میں سے 10 فیصد سے زائد افراد براہ راست متاثر ہوئے ہیں۔

علاقے میں مسلسل جاری کشیدگی کے باعث انسانی بحران سنگین ہوتا جا رہا ہے، جب کہ عالمی سطح پر جنگ بندی کی اپیلوں کا سلسلہ بھی جاری ہے۔