عمران خان کی طبی معائنے کی درخواست، عدالت نے نوٹسز جاری کر دیے

راولپنڈی – پاکستان تحریک انصاف کے بانی عمران خان کے لیے طبی معائنے کی درخواست انسداد دہشتگردی عدالت میں دائر کی گئی ہے۔ درخواست میں مؤقف اختیار کیا گیا ہے کہ عمران خان کو بینائی میں دھندلے پن اور آنکھوں میں دباؤ کی شکایت ہے۔

یہ درخواست عمران خان کی ہمشیرہ علیمہ خان کی جانب سے دائر کی گئی، جس میں مؤقف اختیار کیا گیا ہے کہ سابق وزیرِاعظم کے ذاتی معالج نے آخری بار ان کا آنکھوں کا معائنہ 4 نومبر 2024 کو کیا تھا۔ درخواست گزار نے وفاقی اور پنجاب حکومت کے زیرِ نگرانی ڈاکٹروں پر عدم اعتماد کا اظہار کرتے ہوئے مطالبہ کیا ہے کہ عمران خان کے ذاتی معالج کو مجوزہ میڈیکل بورڈ میں شامل کیا جائے۔

درخواست میں یہ بھی کہا گیا ہے کہ عمران خان کو جیل میں بنیادی انسانی حقوق سے محروم رکھا جا رہا ہے، لہٰذا اڈیالہ جیل کے سپرنٹنڈنٹ کو فوری طور پر میڈیکل بورڈ تشکیل دینے کا حکم دیا جائے۔

انسداد دہشتگردی عدالت کے جج امجد علی شاہ نے ابتدائی سماعت کے بعد سپرنٹنڈنٹ اڈیالہ جیل اور پراسیکیوشن فریق کو نوٹس جاری کرتے ہوئے 29 اگست تک جواب طلب کر لیا ہے۔