عمران خان کا طبی معائنہ پمز اسپتال میں، جیل واپس منتقل

حکومت نے اس بات کی تصدیق کی ہے کہ پاکستان تحریک انصاف کے بانی اور سابق وزیرِ اعظم عمران خان کو گزشتہ ہفتے طبی معائنے کے لیے پاکستان انسٹیٹیوٹ آف میڈیکل سائنسز (پمز) منتقل کیا گیا تھا۔
وفاقی وزیر اطلاعات عطاء اللہ تارڑ نے عمران خان کی صحت سے متعلق گردش کرنے والی خبروں پر وضاحت دیتے ہوئے کہا کہ آنکھوں کے ماہر ڈاکٹروں نے پہلے اڈیالہ جیل میں ان کا معائنہ کیا، جس کے بعد ہفتے کی شب انہیں پمز اسپتال لے جایا گیا۔ ان کے مطابق وہاں تقریباً 20 منٹ تک طبی جانچ کے بعد عمران خان کو واپس جیل منتقل کر دیا گیا۔
عطاء اللہ تارڑ نے کہا کہ عمران خان کی صحت تسلی بخش ہے اور جیل میں موجود تمام قیدیوں کو طبی سہولیات فراہم کی جا رہی ہیں۔ ان کا کہنا تھا کہ جب بھی جیل ڈاکٹر کسی قیدی کو اسپتال ریفر کرتے ہیں تو اس پر عمل کیا جاتا ہے۔
اس سے قبل پاکستان تحریک انصاف نے دعویٰ کیا تھا کہ عمران خان ایک سنگین آنکھ کے انفیکشن میں مبتلا ہیں جو بروقت علاج نہ ہونے کی صورت میں بینائی کو مستقل نقصان پہنچا سکتا ہے۔ پارٹی کے مطابق ان کی دائیں آنکھ میں ریٹینل وین میں رکاوٹ پیدا ہو گئی ہے، جو ایک تشویشناک طبی حالت ہے۔
پی ٹی آئی نے الزام عائد کیا تھا کہ جیل انتظامیہ علاج کو جیل کے اندر ہی محدود رکھنا چاہتی ہے، حالانکہ ڈاکٹروں کے مطابق ضروری علاج جیل میں ممکن نہیں۔ پارٹی نے عدالت سے طبی معائنے کی اجازت دینے کی درخواست بھی کی تھی، جو تاحال زیرِ التوا ہے۔