عالمی کشیدگی کا اثر: سونا اور چاندی نے تاریخ رقم کر دی!

عالمی سطح پر جغرافیائی خطرات اور معاشی غیر یقینی صورتحال کے اثرات سے قیمتی دھاتوں کی قیمتیں نئی بلندیوں کو چھو گئی ہیں۔ پیر کے روز سونے کی قیمت پہلی بار 4,600 ڈالر فی اونس کی حد عبور کر گئی، جبکہ چاندی نے بھی اپنی بلند ترین سطح حاصل کر لی۔
مارکیٹ میں اسپاٹ گولڈ کی قیمت 4,469.49 ڈالر فی اونس تک پہنچ گئی اور دورانِ کاروبار 4,600.33 ڈالر کی ریکارڈ سطح بھی دیکھی گئی۔ فروری کے لیے امریکی گولڈ فیوچرز 2 فیصد اضافے کے ساتھ 4,591.10 ڈالر پر ٹریڈ کر رہے تھے۔
ماہرین کے مطابق سونا اور چاندی کی قیمتوں میں اضافہ بنیادی طور پر عالمی سیاسی کشیدگی اور سرمایہ کاروں کی محفوظ سرمایہ کاری کی طرف رجحان کی وجہ سے ہوا ہے۔ امریکہ میں کمزور روزگار کے اعداد و شمار نے بھی توقعات پیدا کی ہیں کہ فیڈرل ریزرو اس سال شرح سود میں کم از کم دو بار کمی کر سکتا ہے، جس سے قیمتی دھاتوں کی طلب بڑھ گئی۔ ڈالر کی کمزور قدر بھی اس اضافے کو سہارا دے رہی ہے۔
چاندی کی قیمت میں 3.5 فیصد اضافہ ریکارڈ کیا گیا اور یہ 82.72 ڈالر فی اونس تک پہنچی، جبکہ دورانِ سیشن 83.96 ڈالر کی بلند ترین سطح بھی دیکھی گئی۔ پلاٹینم کی قیمت میں 3.2 فیصد اضافہ ہوا اور یہ 2,345.40 ڈالر فی اونس تک جا پہنچی، جبکہ گزشتہ ماہ یہ 2,478.50 ڈالر کی بلند ترین سطح پر رہی تھی۔