شاہ رخ خان اور گوری کی محبت میں نیلم کا دلچسپ کردار

بولی ووڈ کے سپر اسٹار شاہ رخ خان اور ان کی اہلیہ گوری خان کی محبت کی داستان ہمیشہ سے مداحوں کے لیے کشش کا باعث رہی ہے۔ اب اس مشہور رشتے سے جڑی ایک کم معروف مگر دل چسپ حقیقت سامنے آئی ہے، جس کا تعلق 90 کی دہائی کی مقبول اداکارہ نیلم سے ہے۔
حال ہی میں ایک معروف گلوکاری کے رئیلٹی شو کے خصوصی رومانوی ایپی سوڈ میں بطور مہمان شریک اداکارہ نیلم نے اپنی زندگی سے جڑی ایک یاد شیئر کی، جس نے شائقین کو چونکا دیا۔ نیلم کے مطابق، خود شاہ رخ خان نے انہیں ایک ملاقات کے دوران مسکراتے ہوئے بتایا تھا کہ ان کی اور گوری کی شادی کے پیچھے نیلم کا بھی ایک خاص کردار ہے۔
اداکارہ نے وضاحت کی کہ اپنے فلمی کیریئر کے عروج کے زمانے میں شاہ رخ خان اور گوری دونوں ہی ان کے بڑے مداح تھے۔ وہ اکثر ایک ساتھ نیلم کی فلمیں دیکھنے جایا کرتے تھے۔ انہی ملاقاتوں اور مشترکہ دلچسپیوں کے دوران دونوں کے درمیان دوستی پروان چڑھی، جو وقت کے ساتھ محبت میں تبدیل ہو گئی۔
نیلم کا کہنا تھا کہ اس وقت انہیں بالکل اندازہ نہیں تھا کہ ان کی فلمیں کسی کی زندگی کے سب سے اہم رشتے کی بنیاد بن رہی ہیں۔ بعد میں جب شاہ رخ خان نے یہ بات انہیں بتائی تو وہ خود بھی حیران رہ گئیں۔
یاد رہے کہ نیلم 80 اور 90 کی دہائی میں رومانوی اور خاندانی فلموں کا ایک نمایاں نام رہی ہیں۔ اداکار گووندا کے ساتھ ان کی فلمی جوڑی کو خاص مقبولیت حاصل ہوئی اور متعدد فلموں نے شاندار کامیابی حاصل کی۔ حالیہ برسوں میں نیلم ڈیجیٹل پلیٹ فارمز پر بھی نظر آ چکی ہیں اور جلد ایک نئے رئیلٹی کوئز شو میں اپنی قریبی دوستوں کے ہمراہ جلوہ گر ہوں گی۔