شادی کے بعد تنقید کا سامنا، نبیہہ علی خان کی آنکھوں میں آنسو

کلینیکل سائیکالوجسٹ اور سابق نیوز اینکر نبیہہ علی خان نے حال ہی میں ایک انٹرویو اور پوڈکاسٹ کے دوران اپنی زندگی کی مشکلات اور حالیہ شادی کے بارے میں کھل کر بات کی۔ نبیہہ نے بتایا کہ شادی کے بعد ان پر سوشل میڈیا پر شدید تنقید کی گئی، جس میں ان کے عروسی لباس اور زیورات کی قیمت بھی موضوع بحث بنی۔

انہوں نے واضح کیا کہ لباس کا انتخاب ان کی ذاتی پسند کے مطابق تھا، تاہم قیمت پر تنقید نے انہیں جذباتی کر دیا۔ نبیہہ نے دورانِ گفتگو اپنی زندگی کے مشکل مراحل کا بھی ذکر کیا، خاص طور پر والد کے انتقال اور والدہ کی اکیلی پرورش، جس نے انہیں کم عمری میں کام کرنے کی ترغیب دی۔

نبیہہ علی خان نے کہا کہ وہ تنقید سے متاثر نہیں ہوں گی اور اب اپنی زندگی کو اپنے اصولوں کے مطابق گزاریں گی۔ انہوں نے لوگوں سے کہا کہ ہر مسکراہٹ کے پیچھے ایک کہانی ہوتی ہے اور انہوں نے اپنی محنت اور جدوجہد کے ذریعے آج یہ مقام حاصل کیا ہے۔

نبیہہ اور ان کے شوہر حارث کھوکھر تقریباً چھ سال تک ایک این جی او میں ساتھ کام کرتے رہے، جس کے بعد باہمی اعتماد اور محبت نے انہیں شادی کی طرف لے جایا۔ شادی ایک سادہ تقریب میں، معروف مذہبی اسکالر مولانا طارق جمیل کے گھر میں ہوئی۔