سیاحتی شہر انطالیہ میں افسوسناک واقعہ، بس حادثے میں 9 اموات

ترکی کے معروف سیاحتی شہر انطالیہ میں ایک مسافر بس شدید حادثے کا شکار ہو گئی، جس کے نتیجے میں 9 افراد جان کی بازی ہار گئے جبکہ 26 مسافر زخمی ہو گئے۔ حادثہ خراب موسم اور تیز رفتاری کے باعث پیش آیا۔
ابتدائی رپورٹس کے مطابق بارش کے دوران بس ڈرائیور گاڑی پر قابو نہ رکھ سکا، جس کے باعث بس سڑک سے پھسل کر گہری کھائی میں جا گری۔ حادثے کے وقت بس میں مجموعی طور پر 34 افراد سوار تھے۔
واقعے کی اطلاع ملتے ہی امدادی ٹیمیں فوری طور پر جائے حادثہ پر پہنچ گئیں اور زخمیوں کو قریبی طبی مراکز منتقل کیا گیا۔ بعض زخمیوں کی حالت نازک بتائی جا رہی ہے۔
حکام کے مطابق حادثے کی وجوہات جاننے کے لیے تحقیقات کا آغاز کر دیا گیا ہے، جبکہ ابتدائی شواہد میں شدید بارش، سڑک پر پھسلن اور رفتار کو حادثے کی ممکنہ وجوہات قرار دیا جا رہا ہے۔
حادثے کے بعد متاثرہ سڑک پر ٹریفک کچھ دیر کے لیے معطل رہی، جسے بعد میں بحال کر دیا گیا۔ متعلقہ اداروں نے ڈرائیوروں کو خراب موسم میں محتاط ڈرائیونگ کی ہدایت جاری کی ہے۔