روس میں کرسمس 7 جنوری کو کیوں منایا جاتا ہے؟

دنیا کے بیشتر ممالک میں کرسمس 25 دسمبر کو منائی جاتی ہے، تاہم روس میں یہ تہوار ہر سال 7 جنوری کو آتا ہے۔ اس کی وجہ روسی آرتھوڈوکس چرچ کا وہ کیلنڈر ہے جو صدیوں پرانی روایت کے تحت آج بھی استعمال کیا جاتا ہے۔
تاریخی طور پر عیسائی دنیا جولین کیلنڈر پر عمل کرتی تھی، مگر 1582 میں یورپ کے کئی ممالک نے گریگورین کیلنڈر اختیار کر لیا، جو وقت اور موسم کے فرق کو زیادہ درست انداز میں ظاہر کرتا ہے۔ روسی چرچ نے مذہبی مواقع کے لیے پرانا کیلنڈر برقرار رکھا، جس کے باعث آج دونوں کیلنڈرز کے درمیان 13 دن کا فرق پیدا ہو چکا ہے۔ اسی فرق کی وجہ سے روس میں کرسمس 7 جنوری کو منائی جاتی ہے۔
اگرچہ روس میں سرکاری اور روزمرہ زندگی میں گریگورین کیلنڈر استعمال ہوتا ہے، لیکن چرچ آج بھی اپنے مذہبی تہوار جولین کیلنڈر کے مطابق مناتا ہے۔
روس میں کرسمس کا انداز دیگر ممالک سے مختلف ہے۔ یہاں نئے سال کی رات کو زیادہ جوش و خروش، آتش بازی اور تحائف کا تبادلہ ہوتا ہے، جبکہ کرسمس کا دن سکون، عبادت اور خاندانی وقت کے لیے مخصوص ہوتا ہے۔